Lot ti reste Kanaan avek son tonton, Abraam. Avek letan, Abraam ek Lot ti ganny en kantite zannimo e landrwa ti tro pti pour tou zot bann zannimo. Abraam ti dir avek Lot: ‘Nou pa pou kapab reste ansanm dan menm landrwa. Silvouple swazir kote ou ti a kontan ale. Si ou al isi mwan mon pou al laba.’ Abraam pa ti mazin zis son prop lekor, pa i vre?

Lot ti vwar en zoli landrwa ki ti o bor en lavil ki apel Sodonm. I ti annan en kantite delo ek zerb. Alor, i ti swazir sa landrwa e i ti al reste laba avek son fanmir.

Bann dimoun Sodonm ek sa lot lavil Gomor ti vreman move. Anfet, zot ti sitan move ki Zeova ti deside pour detri sa bann lavil. Me Bondye ti oule sov Lot ek son fanmir. Alor, i ti anvoy de lanz pour dir li: ‘Depese! Sorti dan sa lavil! Zeova pe al detri li.’

Lot pa ti al deswit. I ti tarde pour li ale. Alor, bann lanz ti atrap lanmen Lot, son madanm ek son de fiy e fer zot depese pour sorti dan sa lavil. Bann lanz ti dir: ‘Taye! Sov zot lavi e pa get deryer. Si zot get deryer, zot pou mor!’

Ler zot ti ariv kot en lavil ki apel Zoar, Zeova ti fer en lapli dife ek souf tonm lo Sodonm ek Gomor. Sa de lavil ti ganny detrir konpletman. Ler madanm Lot ti dezobei Zeova e vir deryer,  i ti vin en stati disel! Me Lot ek son bann fiy ti sen e sof akoz zot ti obei Zeova. I bezwen ki zot ti vreman sagren akoz madanm Lot ti’n dezobei. Me zot ti kontan akoz zot ti’n ekout bann lenstriksyon Zeova.