Lot okodụn̄ ke Canaan ye Abraham eyeneka ete esie. Nte ini akakade, ufene Abraham ye Lot ama awak tutu isọn̄ ikemke mmọ mbiba aba. Ntre Abraham ama ọdọhọ Lot ete: ‘Isọn̄ emi ikemke nnyịn mbiba aba. Mbọk mek ebiet emi akpamade ndika, ndien ami nyaka ebiet en̄wen.’ Omokụt do ke Abraham ikebemke iso iyom ufọn idemesie!

Lot ama okụt ediye isọn̄ kiet emi ekekperede Sodom. Mmọn̄ ye mbiet ama awak do. Enye ama emek do onyụn̄ emen ubon esie okodụn̄ do. Ekem mmọ ẹma ẹwọrọ ẹka Sodom.

Sodom ekekpere Gomorrah. Mbon Sodom ye mbon Gomorrah ẹma ẹdiọk etieti. Mmọ ẹma ẹdiọk tutu Jehovah ọdọhọ ke imọn̄ isobo mmọ. Edi enye ikoyomke ndisobo Lot ye ubon esie. Ntre enye ama ọdọn̄ angel iba ẹka ẹkedọhọ mmọ ẹte: ‘Sọsọp wọrọ ke obio emi! Jehovah ọmọn̄ osobo obio emi.’

Lot ikọsọpke iwọrọ. Enye ama ada abiat ini. Ntre mme angel oro ẹma ẹmụm Lot ye n̄wan esie ye nditọ esie iban iba ubọk ẹda ẹwọrọ ke obio oro ẹnyụn̄ ẹdọhọ mmọ ẹte: ‘Ẹfehe mbak ẹdisobo mbufo, ẹkûse edem! Edieke ẹsede edem, ẹyekpan̄a!’

Ke ini mmọ ẹkesịmde obio emi ẹkotde Zoar, Jehovah ama anam sulfur ye ikan̄ ẹdep ẹdita Sodom ye Gomorrah. Jehovah ama osobo obio mbiba oro. Ke ini n̄wan Lot ọkọsọn̄de ibuot ye  Jehovah onyụn̄ esede edem, enye ama akabade adaha inụn̄. Edi Lot ye nditọ esie ẹma ẹbọhọ sia mmọ ẹma ẹnam se Jehovah ọkọdọhọde. Anaedi se iketịbede inọ n̄wan Lot ama enen̄ede afịna Lot ye nditọ esie. Edi ama enem mmọ nte mmọ ẹkenamde se Jehovah ọkọdọhọde.