Lot nämene nüne grü kwe Abrahán ben kä Canaán yekänti. Niaratre nibu ye nämene jondron nire ngübare krubäte, yebätä kä ñaka namanina krubäte ietre jondron nire ye ngübakäre jökrä keteitibe. Aisete, Abrahán niebare Lot ie: ‘Ni ñaka raba nüne jankunu gwairebe kä keteitibe te. Ye medenbätä, mä törba näin kä meden kokwäre erere mä rika aune ti näin kä mada kokwäre’. Abrahán ja töi mikani kwin krubäte, ¿ñan ererea?

Lot nikrabare ye ngwane kä kwin jutuabare ie, ñö aune mikä kare nämene krubäte kä yekänti. Yebätä, ja töi mikani kwe kä ye den jai aune nikani nüne mräkätre kwe yebe kä yekänti, juta kädeka nämene Sodoma ye ken.

Nitre nünanka Sodoma aune Gomorra ye nämene ja ngwen blo krubäte. Nitre ye nämene ja ngwen blo krubäte yebätä Jehová ja töi mikani juta ketebu ye gainte. Akwa, Jehová tö namani Lot aune mräkätre kwe ye mikai kwäre, yebätä angeletre nibu juani kwe kukwe ne niere ie: ‘¡Jötrö! ¡Ngitie juta ne bäre mento! ¡Jehová bike juen ngwarbe!’.

Akwa Lot namani ngrötöte, yebätä kä namani rairebiti. Ye medenbätä, angeletre niara, muko kwe, ngängän nibu kwe ye kani kisebiti aune nikani ngwena betekä mentokwäre juta ye bäre. Niaratre niebare ietre: ‘¡Mun nän betekä! ¡Ngitie ne kwe mun ñaka krütadre! ¡Munkwe nikrai ja jiebiti angwane mun krütadi!’.

Namanintre juta Zóar yekänti angwane, Jehovakwe ñukwä jutra ngitiekä aune asufre ye mikani näkäin juta Sodoma aune Gomorra yebiti. Juta ketebu ye juani ngwarbe täte. Lot muko ñaka Jehová kukwei mikani täte,  nikrabare kwe ja jiebiti aune nikwitani mren jäire. Akwa, Lot aune ngängän kwe namaninte nire niaratre Jehová kukwei mikani täte yebätä. Niaratre namani ulire krubäte raba ruin nie, ñobätä ñan aune Lot muko ñaka Ngöbö kukwei mikani täte, akwa niaratre töi namaninta jäme, ñobätä ñan aune niaratre Jehová kukwei mikani täte.