Lot wa turire puna Abraham, erumbi raihe mehi raKanaan. Nu kombunda Abraham na Lot va kahara ovinamuinyo ovingi tjinene, nu kava ri nehi nda yenene kovinamuinyo vyawo avihe. Abraham arire tja tja ku Lot: ‘Eṱe kamaatu sora okuhupa pamwe rukwao. Arikana ritoororera ehi ku mo vanga okuyenda nu ami me i komukuma warwe.’ Ihi tja ri otjiraisiro tjokutja Abraham kee ripurire ku ye omuini nu, katjiperi?

Lot wa muna omukuma mbwaau munika nawa mbwa ri popezu notjihuro tjaatji isanewa Sodom. Nu kwa ri omeva omengi nehozu engirine. Eye we ritoororera oruveze ndwi, neye neṱunḓu re va tjindira ngo.

Ovandu vaSodom nowotjihuro tji tja ri popezu hi Gomora, va ri ovarunde tjinene. Nowo tjiri aave tjiti ouvi ngandu indu Jehova tja toora omukambo wokuyandeka ovihuro mbyo. Posiya Jehova aa vanga okuyama Lot neṱunḓu re, nu wa hinda ovaengeli 2 okukeverakiza kutja, ‘Hakahaneye okupita motjihuro! Jehova ma yandeke otjihuro hi.’

Lot kena pa hakahana okupita motjihuro. Eye wa kambura orure. Okutja ovaengeli otji va kambura Lot nomukazendu we, novanatje ve 2 ovakazona komake, nave ve pitisa pendje notjihuro, nave tja: ‘Tupukeye! Tauriseye omiinyo vyeṋu! Amu taviza kombunda. Tji mwa taviza mamu ṱu!’

Tji va vaza motjihuro tjaSoar, Jehova wa rokisa omuriro omunene kombanda yaSodom na Gomora. Ovihuro mbyo otji vya yandekwa  oparukaze. Indu omukazendu waLot tje ha karere nonḓuviro ku Jehova na tara kombunda, eye wa tjituka otjitundu tjomongwa. Nungwari Lot novakazona ve va yamwa mena ronḓuviro yawo ku Jehova. Mape ya kutja tjiri va hihamwa omutima kutja omukazendu waLot kari nonḓuviro. Nungwari owo vari nenyando kutja va puratena komirari vyaJehova.