Lot diau enggau aya iya, Abraham ba menua Kanaan. Nyau kelama, Abraham enggau Lot bisi mayuh jelu tupi nyentukka tanah enda chukup ke sida. Ku Abraham madah ngagai Lot: ‘Kitai enda ulih diau begulai ba siti endur. Pilih ni menua ti dikedekaka nuan. Nuan nguing nengah jalai siti, lalu aku nguing nengah jalai siti.’ Abraham enda berundingka diri empu, enda pia?

Lot meda siti endur ti amat manah semak nengeri ke dikumbai Sodom. Endur nya bisi mayuh ai enggau rumput. Nya alai, iya milih endur nya lalu sida sebilik pindah kia.

Orang Sodom enggau orang ke diau semak nya, ba nengeri Gomorah amat jai. Sida amat jai nyentukka Jehovah ngaga pemutus deka ngerusak dua iti nengeri nya. Tang Petara deka nyelamatka Lot sebilik. Nya kebuah Iya nganjung dua iku melikat nangkan sida: ‘Jampat! Pansut ari nengeri tu! Jehovah deka ngerusak nengeri tu.’

Lot enda terus ninggalka nengeri nya. Iya betangguh. Nya alai, dua iku melikat nya megai jari Lot, bini iya, enggau dua iku anak indu iya lalu ngansak sida pansut ari nengeri nya. Ku sida: ‘Belanda! Ngidupka nyawa diri lalu anang malik ke belakang. Enti kita malik ke belakang kita deka mati!’

Lebuh sida datai ba nengeri Soar, Jehovah ngujan api merirang ba Sodom enggau Gomorah. Dua iti nengeri nya abis rusak. Lebuh  bini Lot malik ke belakang, iya nyadi tiang garam! Tang Lot enggau dua iku anak indu iya selamat laban ngasika Jehovah. Sida tentu amat tusah ati lebuh bini Lot enda ngasika Jehovah. Nya alai, amat beguna enti kitai ngasika Jehovah.