Nagyan ni Lot idiay Canaan, a kaduana ti angkelna a ni Abraham. Immadu ti tarakenda nga animal isu a saanen nga umanay ti paggigiananda. Kinuna ni Abraham ken Lot: ‘Saantan a mabalin nga agyan iti maymaysa a lugar. Pangngaasim ta agpilika no sadino ti kayatmo a pagyanan ket mapanak iti sabali a lugar.’ Di kad nagsingpet ni Abraham?

Adda nakita ni Lot a napintas a lugar nga asideg iti siudad a naawagan Sodoma. Adu ti danum ken berde a ruot iti dayta a lugar, isu a dayta ti pinili ni Lot ket immakar sadiay a kadua ti pamiliana. Idi agangay, immakarda idiay Sodoma.

Nakadakdakes dagiti tattao idiay Sodoma ken iti siudad ti Gomorra nga adda iti asidegna. Isu a kayat ni Jehova a dadaelen dagita a siudad. Ngem kayat ti Dios nga isalakan ni Lot ken ti pamiliana, isu a nangibaon kadakuada iti dua nga anghel ket kinunada: ‘Darasenyo! Rummuarkayo iti siudad! Dadaelen dayta ni Jehova.’

Saan a dagus a pimmanaw ni Lot, isu nga iniggaman dagiti anghel ti ima ni Lot, ti asawana, ken ti dua a balasangna ket nagdardarasda a nangiruar kadakuada iti siudad. Kinunada: ‘Agtaraykayo tapno dikay matay! Saankayo a tumaltaliaw. No tumaliawkayo, mataykayo!’

Idi nakadanonda iti siudad ti Zoar, pinagtudo ni Jehova iti apuy ken asupre (sulfur) iti Sodoma ken Gomorra. Nadadael dagita a siudad.  Saan a nagtulnog ken Jehova ti asawa ni Lot ket timmaliaw isu a nagbalin nga adigi nga asin. Ngem saan a naan-ano ni Lot ken ti dua a balasangna gapu ta nagtulnogda ken Jehova. Sigurado a nalidayanda ta saan a nagtulnog ti asawa ni Lot. Ngem naragsakanda ta nagtulnogda iti bilin ni Jehova.