Laj Lot kiwank rikʼin laj Abrahan, li rikan, saʼ li naʼaj Canaan. Laj Abrahan ut laj Lot keʼtamk li xketomq ut inkʼaʼ chik tzʼaqal xnaʼajebʼ. Joʼkan naq, laj Abrahan kixye re laj Lot: «Inkʼaʼ chik naru nokoowank saʼ jun chi naʼaj. Bʼaanu usilal, sikʼ bʼar wank re li naʼaj taawaj xik ut laaʼin tinxik saʼ junpakʼal chik». Peʼyaal naq chaabʼil laj Abrahan?

Laj Lot kiril naq wank jun jachal li chʼochʼ li jwal chʼinaʼus, wank naabʼal li haʼ chisaʼ ut li ichaj. Joʼkan naq, kixchap li naʼaj aʼin ut xkoho chi wank aran rikʼin li xjunkabʼal, chixkʼatq jun li tenamit Sodoma xkʼabʼaʼ.

Ebʼ li poyanam re Sodoma ut li tenamit Gomorra jwal maaʼusebʼ xnaʼlebʼ. Joʼkan naq, li Jehobʼa kixye naq tixsach li wiibʼ chi tenamit aʼin. Abʼan li Yos naraj xkolbʼal laj Lot ut li xjunkabʼal, joʼkan naq, kixtaqla wiibʼ li anjel chi xyeebʼal rehebʼ: «Sebʼomaq eeribʼ! Elenqex saʼ li tenamit aʼin! Li Jehobʼa ok re xsachbʼal!».

Abʼan laj Lot inkʼaʼ kiʼelk saʼ junpaat, kʼajoʼ naq kibʼayk. Joʼkan naq, ebʼ li anjel keʼxchap chi ruqʼ laj Lot, li rixaqil, ut ebʼ li rabʼin, ut saʼ junpaat keʼisiik saʼ li tenamit. Ut keʼyeheʼk rehebʼ: «Aanilanqex! Elelinqex re naq inkʼaʼ texkamq, ut mexʼilok cheerix! Wi texʼiloq cheerix, texkamq».

Naq keʼwulak saʼ li tenamit Zoar, li Jehobʼa kixbʼaanu naq tkubʼeeq chaq xaml ut asuupr saʼ xbʼeen Sodoma ut Gomorra. Li wiibʼ chi  tenamit aʼin keʼosoʼk chi junajwa. Li rixaqil laj Lot inkʼaʼ kiʼabʼink chiru li Jehobʼa, kiʼilok chirix ut kisutqʼiik choʼq xpekil atzʼam. Abʼan laj Lot ut ebʼ li rabʼin xeʼkoleʼk xbʼaan naq xeʼabʼink. Chʼolchʼo naq keʼrahoʼk saʼ xchʼool xbʼaan naq li rixaqil laj Lot inkʼaʼ kiʼabʼink, abʼan sahebʼ saʼ xchʼool xbʼaan naq keʼabʼink chiru li Jehobʼa.