Lot okwa li ha kala medu laKanaan pamwe nomumwaina waxe Abraham. Lwanima ova ka kala ve na oimuna ihapu nokapa li onhele yokulya oimuna ya wana. Abraham okwa tya kuLot: ‘Itatu dulu vali okukala ponhele imwe. Hoolola hano kutya owa hala okuya kombinga ilipi, opo nee handi dulu okuya kombinga ikwao.’ Osho otashi ulike kutya Abraham ka li e lihole mwene.

Lot okwa li a mona oshitukulwa shedu shiwa popepi noshilando shedina Sodom. Oshitukulwa osho osha li shi na omeva nomwiidi muhapu. Onghee hano, okwa li a hoolola onhele oyo nokutembukila ko pamwe novaneumbo laye.

Ovanhu vomuSodom naGomorra ova li hava longo owii neenghono. Jehova okwa li a tokola okuhanauna po oilando oyo omolwowii wayo. Ashike okwa li a hala okuxupifa Lot novaneumbo laye nomolwaasho a li a tuma ovaengeli vavali ve va londwele kutya: ‘Fikameni, djeni mo monhele ei, osheshi Jehova ota ka hanauna po oshilando.’

Lot ka li a fiya po oshilando osho diva molwaashi okwa kala ta ongaonga. Ovaengeli ova li va kwata Lot, omukulukadi waye novanakadona vavo, ndele tave va endelelifa va dje mo moshilando tava ti: ‘Lotokeni! Xupifeni eemwenyo deni! Inamu tala monima nye inamu kanghama, ngeenge omwa tale konima otamu fi.’

Eshi va fika moshilando shedina Soar, Jehova okwa li a lokifila Sodom naGomorra osulfuri nomundilo. Oilando oyo ivali oya li ya hanaunwa po filufilu. Molwaashi omukulukadi waLot ka li a dulika kuJehova, okwa tala konima ndele ta shituka oshivanda shomongwa. Ashike Lot novanakadona  vaye ova li va xupifwa molwaashi ova dulika kuJehova. Otashi dulika va li va nyika oluhodi neenghono eshi omukulukadi waLot a li ina dulika, ashike ova li va hafa eshi va dulika komalombwelo aJehova.