Lote ua tungile ni sekulu’ê Mbalahamu, mu mbanza ia Kanana. Mu kubhita thembu Mbalahamu ni Lote, akexile ni iama iavulu, mukonda dia kiki o kididi kia tolele phala o iama. Mu kienhiki, Mbalahamu uambela Lote: ‘Ki tu tokala kutunga dingi mu kididi kimoxi. Nga ku dióndo sola o kididi ki ua mesena ku ditela. Se u ditela ku kadilu eme ngi ditela ku kiasu.’ Mbalahamu kexile mukua luimbi.

Lote ua mono o mbandu ia fuama ia ixi, bhua zukamene ku mbanza a ixana Sodoma. Kuenhoko kuexile iangu ia uisu, ni menha avulu. Muene ni muiji uê, ai mu tunga bhenhobo.

O athu akua Sodoma ni Ngomola, exile athu aiibha. Mu kienhiki, Jihova ua kanene kubuikisa o jimbanza jiji. Maji Jihova ua mesenene kubhulula, Lote ni muiji uê, iu ua tumikisa jianju jiiadi phala kua dimuna: ‘Lengulukenu! Tundenu mu mbanza íii! Jihova ua-nda i buikisa.’

Maji Lote ka tundu ni lusolo. Muene ua kexile mu laleka hanji kiavulu. Mu kiki, o jianju ja kuata mu lukuaku lua Lote, lua muhatu, ni lua tuana tuê: ‘Lengenu! Bhululenu o mienhu ienu. Ki mu tale ku dima, phala ki mu fue!’

Kioso ene kia bhixila mu mbanza ia Zouale, Jihova ua bhangesa kunoka nvula ia túbhia mu jimbanza ja Sodoma, ni  Ngomola. O jimbanza jiiadi, ja buika. Mu kienhiki o muhatu ua Lote ka belesela Jihova, iu ua tale ku dima, mu kubhanga kiki, muene ua kituka philadi ia môngua! Lote ni tuana tuê, nange a luualele kiavulu mu kumona o kubhukumuka kua muene. Maji ene a sangulukile ue kiavulu, mukonda dia kubelesela Jihova ni kua bhulula.