တၢ်မၤလိ ၁၀
သ့ၣ်နီၣ်ထီၣ်က့ၤ စီၤလိာ်အမါ
စီၤလိာ်အိၣ်တပူၤဃီဒီး အဖါတံၢ်စီၤအၤဘြၤဟၣ်လၢ ကီၢ်ကနၤဧၣ်အပူၤလီၤ. မ့ၢ်လၢစီၤအၤဘြၤဟၣ်ဒီးစီၤလိာ် အိၣ်ဒီးဆၣ်ဖိကီၢ်ဖိအါအါဂီၢ်ဂီၢ်အဃိ တၢ်လီၢ်တလၢ လၢအဝဲသ့ၣ်အဂီၢ်ဘၣ်. အဃိ စီၤအၤဘြၤဟၣ် တဲဘၣ်စီၤလိာ်လၢ– ‘ပအိၣ်တၢ်လီၢ်တပူၤဃီတသ့လၢၤဘၣ်. ဃုထၢတၢ်လီၢ်တတီၤလၢ နအဲၣ်ဒိးအိၣ် ဒီးယကဃုထၢတၢ်လီၢ်လၢ အဂၤတတီၤလီၤ.’ ခီဖျိလၢစီၤအၤဘြၤဟၣ်မၤဝဲဒ်အံၤအဃိ အဝဲပာ်ဖျါထီၣ်လၢ အတမ့ၢ်ပှၤလၢ အအဲၣ်လီၤထဲအနီၢ်ကစၢ်အသးဘၣ်.
စီၤလိာ်ထံၣ်ဘၣ်ဝဲတၢ်လီၢ်လၢ အဂ့ၤတတီၤဒီး တၢ်လီၢ်အဝဲန့ၣ် အိၣ်ဒီးနီၣ်လါဟ့ ဒီးထံလၢလၢပှဲၤပှဲၤလီၤ. တၢ်လီၢ်အဝဲအံၤအိၣ်ဘူးဒီးဝ့ၢ်စဒိၣ်လီၤ. လၢတၢ်န့ၣ်အဃိ စီၤလိာ်ဃုထၢဝဲတၢ်လီၢ်တတီၤန့ၣ်လီၤ. အဝဲဒီးအဟံၣ်ဖိဃီဖိလဲၤအိၣ်ဝဲဖဲတၢ်လီၢ်ဝဲန့ၣ်လီၤ.
ပှၤအိၣ်လၢဝ့ၢ်စဒိၣ် ဒီးဝ့ၢ်ဂမိရၤန့ၣ် မ့ၢ်ပှၤလၢအအၢအသီဒိၣ်မးလီၤ. မ့ၢ်လၢအဝဲသ့ၣ်မၤတၢ်အၢအၢသီသီအဃိ ယဟိဝၤယွၤဆၢတဲာ်လီၤအသးလၢ ကမၤဟးဂီၤကွံာ်ဝဲဝ့ၢ်တဖၣ်အံၤလီၤ. ဘၣ်ဆၣ် ကစၢ်ယွၤအဲၣ်ဒိးမၤပူၤဖျဲး စီၤလိာ်ဒီးအဟံၣ်ဖိဃီဖိ အဃိ ကစၢ်ယွၤဆှၢလီၤမူခိၣ်ကလူးခံဂၤ ဒ်သိးကဟ့ၣ်ပလီၢ်အဝဲသ့ၣ်န့ၣ်လီၤ. မူခိၣ်ကလူးတဲဘၣ်အဝဲသ့ၣ်လၢ– ‘ဟးထီၣ်လၢဝ့ၢ်ပူၤချ့ချ့, ယဟိဝၤယွၤကမၤဟးဂီၤ ဝ့ၢ်အံၤလီၤ.’
စီၤလိာ်တဟးထီၣ်လၢ ဝ့ၢ်ပူၤတဘျီဃီဘၣ်. အဝဲမၤယံာ်မၤနီၢ်အသးလီၤ. လၢတၢ်န့ၣ်အဃိ မူခိၣ်ကလူးဖီၣ်ဝဲ စီၤလိာ်, အမါဒီး အဖိမုၣ်ခံဂၤအစု ဒီးကရီဆှၢထီၣ်အဝဲသ့ၣ်ဆူဝ့ၢ်ချၢလီၤ. မူခိၣ်ကလူးတဲဘၣ်အဝဲသ့ၣ်လၢ– ‘ဃ့ၢ်ပူၤဖျဲးလၢသုသးသမူအဂီၢ် ဒီးတဘၣ်ကွၢ်ကဒါက့ၤလီၢ်ခံတဂ့ၤ. သုမ့ၢ်ကွၢ်ကဒါက့ၤသုလီၢ်ခံန့ၣ် သုကသံလီၤ.’
ဖဲအဝဲသ့ၣ်လဲၤတုၤလၢ ဝ့ၢ်စိၤဧၢ်အခါ ယဟိဝၤယွၤဒုးလီၤဝဲကးဒီး မ့ၣ်အူလၢဝ့ၢ်စဒိၣ်ဒီးဂမိရၤအဖီခိၣ်လီၤ. ဝ့ၢ်ခံဖျၢၣ်အံၤ ဘၣ်တၢ်မၤဟးဂီၤကွံာ်အီၤခဲလၢာ်လီၤ. စီၤလိာ်အမါတဒိကနၣ် ယဟိဝၤယွၤအကလုၢ်
ဒီးဖဲအဝဲကွၢ်ကဒါက့ၤဆူအလီၢ်ခံအခါ အဝဲကဲထီၣ်ဝဲအံသၣ်ထူၣ်လီၤ. ဘၣ်ဆၣ် စီၤလိာ်ဒီးအဖိမုၣ်ခံဂၤန့ၣ် ပူၤဖျဲးဝဲ မ့ၢ်လၢအဝဲသ့ၣ်ဒိကနၣ် ယဟိဝၤယွၤအကလုၢ်အဃိလီၤ. မ့ၢ်လၢစီၤလိာ်အမါတဒိကနၣ်တၢ်ဘၣ်အဃိ စီၤလိာ်ဒီးအဖိမုၣ် ကသးအုးဝဲဒိၣ်မးလီၤ. ဘၣ်ဆၣ် ခီဖျိလၢအဝဲသ့ၣ်ဒိကနၣ်ဝဲ ယဟိဝၤယွၤအတၢ်ဟံးစုနဲၣ်ကျဲအဃိ အဝဲသ့ၣ်သးခုဝဲလီၤ.“သ့ၣ်နီၣ်ထီၣ်က့ၤစီၤလိာ်အမါတက့ၢ်.”—လူၤကၣ် ၁၇:၃၂