Loti kumosi kazinganga yo Abarayama wa ngw’andi ankazi kuna nsi a Kenani. Kuna kwalanda, Abarayama yo Loti bayantika twela bulu yayingi. E fulu bazingilanga ke kiafwananga diaka ko mu zingila yau nzole. Muna kuma kiaki, Abarayama wavovesa Loti vo: ‘Yeto nzole ke tulendi diaka zingila fulu kimosi ko. Dodokolo, sola kuna ozolele kwenda. Avo wele kuna lunene, omono ngiele kuna lumonso.’ Abarayama kakala ye loko ko, nga ke wau ko?

Loti wamona fulu kimosi kiambote kiakala lukufi ye mbanza Sodomo. Kiazala ye maza ye titi. Muna kuma kiaki, Loti wasola e fulu kiakina yo kwenda ko zingila kumosi ye esi nzo andi.

Esi Sodomo wantu ambi kikilu bakala. E mbanza yakala lukufi ye Sodomo yayikilwanga vo Ngomora, yazala mpe yo wantu ambi. Muna kuma kiaki, Yave wabaka e nzengo za fwasa e mbanza zazi. Kansi, Nzambi wazola vuluza Loti ye esi nzo andi. Wafila mbasi zole mu kubalukisa. Ambasi babavovesa vo: ‘Nusia nswalu! Nuvaika mu mbanza yayi kadi Yave ozolele yo fwasa.’

Kansi, Loti kavaika vana vau ko. Zingila kazingilanga. Muna kuma kiaki, Ambasi basimba Loti, nkaz’andi yo wan’andi wole amakento muna momo yo kubavaikisa muna mbanza. Ambasi bavova vo: ‘Nutina! Nuvuluza mioyo mieno. Ke nutadi ku nima ko. Avo nutadidi ku nima, fwa nufwa.’

 Vava balwaka mu mbanza yayikilwanga vo Soa, Yave wanokesa tiya yo nlengo muna Sodomo ye Ngomora. E mbanza zau zole zafwaswa. O nkaz’a Loti wakolamena Yave yo tala ku nima. Wakituka se tadi dia mungwa. Kansi, Loti yo wan’andi amakento bavuluzwa kadi balemvokela Yave. Nanga nkenda kikilu bamona wau vo nkaz’a Loti wakolamena Yave. Kansi, kiese mpe bamona kadi balemvokela luludiku lwa Yave.