Lota naapila ni malumahe, Abrahama, mwa naha ya Kanana. Hamulaho wa nako, Abrahama ni Lota baba ni limunanu zeñata kuli mane nebasa koni kupila hamoho kabakala sibaka bunyinyani. Abrahama kihaa li ku Lota: ‘Halukoni kupila hamoho mwa sibaka silisiñwi. Ukete sibaka seutabela, mi na nikaya kwa sibaka sisili.’ Kaniti luli, Abrahama naasina buitati.

Lota abona sibaka sesinde kwatuko ni muleneñi obizwa Sodoma. Mwa sibaka seo nekunani mezi amañata ni bucwañi bobunde. Kacwalo, aketa sibaka seo mi atutela kwateñi ni lubasi lwahae.

Batu ba mwa Sodoma ni ba mwa muleneñi oneli bukaufi wa Gomora neli batu babamaswe hahulu. Nebaeza lika zemaswe hahulu kuli mane Jehova aanga muhato wa kuyundisa mileneñi yeo. Kono Mulimu naabata kusileleza Lota ni lubasi lwahae, kacwalo aluma mangeloi amabeli kuyo balemusa kuli: ‘Hamunanuhe! Muzwe mwa muleneñi wo! Jehova uka usinya.’

Lota naasika zwa mwa muleneñi wo honafo feela. Naazwezipili kuzina-zina. Kacwalo, mangeloi aswala Lota, musalaa hae, ni bana bahae babasizana bababeli kwa mazoho ni kubazwiseza kwande a muleneñi, inze ali: ‘Hamumate! Hamusabe, mupilise bupilo bwamina, mi musike mwaitemuna. Hamuka itemuna, mukashwa!’

Hane bafitile kwa muleneñi wa Zoari, Jehova anelisa sulufula ni mulilo fahalimwaa Sodoma ni Gomora. Mileneñi yemibeli yeo neisinyizwe luli.  Musalaa Lota naasika utwa Jehova mi atalima kwamulaho, hasamulaho afetuha sikoto sa lizwai! Kono Lota ni bana bahae nebasilelelizwe kakuli nebautwile Jehova. Balukela kuba bane baikutwile hahulu bumaswe kuli musalaa Lota naasika utwa Jehova. Kono nebatabile hahulu kuli nebalatelezi litaelo za Jehova.