Loti washakamineña namandumi yindi Abarahama mwituña daKenani. Nkumininaku, aAbarahama naLoti ekalili nayimuna yayivulu nankashi nawa iluña dayikeheleli. Abarahama wamulejeli Loti nindi: ‘Hitukutwesha kutwalekahu kushakama iluña dimuku. Mwani tondaku kuwukukeña kuya, ami nukuya kwacheñi.’ Abarahama hakeñeleña kuditiyisha hohu yomweni kuwahaku.

Loti wamweni iluña dadiwahi dadiña kwakwihi namusumba wateneneñawu nawu Sodoma. Kwadiña menji amavulu nankashi nimatahu atuuta akuda anyama. Dichi Loti watondeli idi iluña nawa dikwayiliyi nakushakama nachisaka chindi.

Antu amuSodoma niamumusumba waGomora wadiña kwakwihi akoñeleña yuma yatama nankashi. Kafwampi, antu amuniyi nyisumba adiña nakukoña yuma yatama nankashi chakwila Yehova wafuukwilihu kuyijilumuna iyi nyisumba. Ilaña Nzambi wakeñeleña kumupulwisha Loti nichisaka chindi, dichi watumini añelu ayedi kuya nakumusoñamisha nawu: ‘Nyakalenu! Fumenu muwunu musumba muloña Yehova nakuwujilumuna.’

Loti hashikeneni dakunyamukaku. Wadiña nakushintajala. Dichi añelu amukwatili Loti kuchikasa, nikuchikasa chañodindi nikumakasa awanyanindi awambanda ayedi nakuyitemwishila hanji yamusumba, ayilejeli nawu: ‘Temukenu! Mupulwishi wumi wenu nawa bayi mutala kunyimaku. Neyi mukutala kunyima mukufwa!’

 Chashikiliwu kumusumba waZowari, Yehova wanokesheleli haSodoma naGomora sawufa nikesi. Iyi nyisumba yiyedi ayijilumwini chikupu. Ñoda Loti chadikañiliyi naYehova nakutala kunyima, wabalumukili chishimi chamuñwa! Ilaña Loti nianyanindi apulukili muloña amwovwahilili Yehova. Atela aneñeli nankashi chadikañiliyi ñoda Loti. Ilaña azañaleli muloña wena ovwahilili nshimbi jaYehova.