In nanqʼintoq Lot tukʼil Abrahán, aju ttiy, toj txʼotxʼ te Canaán. E chmet nimku kyalun kykabʼil ex mintiʼtoqtl tembʼil kye kykyaqil. Tuʼntzunju xi tqʼamaʼn Abrahán jlu te Lot: «Melayx bʼant tuʼn kukx qanqʼin tojx tembʼil lu. Najsama, jyoʼnktza alkye plaj taja tuʼn t-xiʼya toj, jakutzun chinxtl weye toj juntl plaj». Ax tok, jun tbʼanel xjaltoq te Abrahán.

Ok tkeʼyin, moqa til, Lot jun piẍ txʼotxʼ aju tbʼanelxixtoq, attoq nim aʼ toj ex chaʼẍ kʼul. Kyjuʼtzun jaw tjyoʼn aju tembʼil lu ex xi anqʼil kyukʼil toj tja toj tembʼil aju, aju tkubʼtoq ttxlaj jun tnam Sodoma tbʼi.

Nya bʼaʼnqetoq xjal toj tnam Sodoma, ax ikx toj juntl tnam aju nqayin tok ttxlaj aju Gomorra tbʼi. Nimtoq nya bʼaʼn in bʼaj kyoj tnam lu, tuʼntzunju kubʼ t-ximen Jehová tuʼn kykubʼ t-xiten. Noqtzun tuʼnj, tajtoq Dios tuʼn tklet Lot ex qe toj tja, kyjuʼtzun e tzaj tsamaʼn kabʼe anjel tuʼn t-xi kyqʼamaʼn jlu kye: «¡Lweyqexe! ¡Kyexe toj tnam lu! ¡Ok kbʼel t-xiten Jehová!».

Noqtzun tuʼnj, mintiʼ ex naj Lot, yajxi bʼant tten. Tuʼntzunju ex jukʼuʼn kyuʼn anjel tukʼix t-xuʼjil ex qe tmeʼl, ex lwey naj i ex qʼiʼn kyuʼn anjel toj tnam. Xi kyqʼamaʼn kye: «¡Kyel oqe! ¡Cheʼx naje tuʼn miʼn kykyime, ex miʼn tzʼajtz kykeʼyin kyiʼjxiye! Qa ma tzʼajtz kykeʼyin kyiʼjxiye, ok che kyimele».

Tej kypon toj tnam Zóar, tzaj tchitun Jehová qʼaqʼ ex ik tzeʼn qʼol in kʼant kyibʼaj tnam Sodoma ex Gomorra. Aʼyeju kabʼe tnam lu bʼiʼx e  kubʼ naj. Mintiʼ xi tbʼiʼn t-xuʼjil Lot aju xi tqʼamaʼn Jehová kye, aj tkeʼyin tiʼjxi ex ok te tqan atzʼin. Atzunte Lot kyukʼil tmeʼl e klet tuʼnju xi kybʼiʼn Jehová. Tzajlo nim kybʼis tuʼnju mintiʼ xi tbʼiʼn t-xuʼjil Lot aju xi tqʼamaʼn Jehová kye, noqtzun tuʼnj, ax ikx bʼaʼntoq in kynaʼn tuʼnju otoq txi kybʼiʼn Jehová.