Ta̱ Lot xíʼin xitora ta̱ Abrahán xi̱ndoona ñuu Canaán. Tá ni̱ya̱ʼa tiempo va̱ása nínanika nu̱ú ñuʼú kundoo kití sa̱na̱na chi ku̱a̱ʼání xi̱kuurí. Xa̱ʼa ña̱yóʼo ni̱ka̱ʼa̱n ta̱ Abrahán xíʼin ta̱ Lot: “Va̱ása nanika kundooyó xíʼin kití sa̱na̱yó nu̱ú ñuʼú yóʼo. Vitin ndaka̱xin miíún nu̱ú kúni̱ún ku̱ʼún, tá yóʼó ná ku̱ʼu̱n iin xiyo, yi̱ʼi̱ ku̱ʼi̱n chí inka xiyo”. Va̱ʼaní ni̱xi̱yo ini ta̱ Abrahán, ¿á su̱ví saá túviún?

Ta̱ Lot xi̱nira íyo iin ñuʼú ña̱ liviní ta íyo ku̱a̱ʼání ti̱kui̱í xíʼin ku̱ʼu̱ ña̱ kaxí kití sa̱na̱ra. Ña̱kán ku̱a̱ʼa̱nra nu̱ú ñuʼú yóʼo xíʼin na̱ veʼera, ta xi̱koora ñuu Sodoma.

Na̱ yiví na̱ ni̱xi̱yo ñuu Sodoma xíʼin ñuu Gomorra nina ña̱ kini xi̱keʼéna. Xa̱ʼa ña̱yóʼo Jehová ni̱ka̱ʼa̱nra sandiʼi-xa̱ʼara u̱vi̱ saá ñuu yóʼo. Soo Ndióxi̱ kúni̱ra ná ka̱ku ta̱ Lot xíʼin na̱ veʼera ña̱kán chi̱ndaʼára u̱vi̱ na̱ ángel ña̱ ku̱ʼu̱nna ka̱ʼa̱nna xíʼin ta̱ Lot: “Kamandó. Keendó ti̱xin ñuu yóʼo chi Jehová sandiʼi-xa̱ʼaraña”.

Soo ni̱ku̱a̱chi̱va ta̱ Lot. Xa̱ʼa ña̱yóʼo va̱ʼaka ti̱in na̱ ángel ndaʼa̱ra, saátu ñá síʼíra xíʼin u̱vi̱ ná se̱ʼera ta ta̱vánana ñuu kán. Ta ni̱ka̱ʼa̱n na̱ ángel xíʼinna: “Kunundó. Kúaʼanndó ña̱ va̱ʼa ná kǒo kuvindó, ta kǒo ndikóndó kotondó chí sa̱tá chi tá ná keʼéndó ña̱yóʼo kuvivandó”.

Tá ni̱xa̱a̱na ñuu Zóar, Jehová sa̱kóonra ñuʼu̱ sa̱tá ñuu Sodoma xíʼin ñuu Gomorra. U̱vi̱ saá ñuu yóʼo ndi̱ʼi-xa̱ʼaña. Ñá síʼí ta̱ Lot  kǒo níxiniso̱ʼoñá ña̱ ni̱ka̱ʼa̱n Jehová chi xi̱toñá chí sa̱tá ta ndu̱uñá iin yu̱u̱ ña̱ ñi̱i̱n. Soo ta̱ Lot xíʼin ná se̱ʼera ni̱ka̱kuna chi xi̱niso̱ʼona ña̱ ni̱ka̱ʼa̱n Jehová. Xa̱ʼa ña̱ kǒo níkandíxa ñá síʼí ta̱ Lot sana ku̱suchí-inira xíʼin se̱ʼera soo ni saá va̱ʼava ku̱nina chi miína xi̱niso̱ʼona ña̱ ni̱ka̱ʼa̱n Jehová.