Lote ua tungile na inentu Avilahama ku Kanana. Va Avilahama na Lote va pitile vimuna va vengi, ngeci ka va hasele naua ku va niungila hamo. Kaha Avilahama ua lekele Lote ngueni: ‘Ka citava naua tu tunge hamo. Hangula ku u ka tungila, kaha ange nange nji ka hangula ku nji ka tungila.’ Aa mezi a muesa ngecize Avilahama ua puile mukua vucili, ni vati?

Lote ua muene cihela ca ku vuaha ku hiehi na mbonge ya Sondoma. Kua kele mema a engi na muila ua cili. Ngeci ua hanguile ku nungulukilako na vusoko vueni.

Vantu va tungile mu Sondoma na mu mbonge ya Ngomola va puile cikuma va vapi. Vipi viavo via lanene cikuma ngeci Yehova ua tondele ku va nongesa. Vunoni ua tondele ku ovola Lote na vusoko vueni, ngeci ua tumine tungelo vavali va ka va nangule nguavo: ‘Tuhukenu vuasi mu mbonge ino! Yehova a i nongesa.’

Lote ua kele na malanga, kaha ka tuhukilemo mu ntsimbu ize vene. Ua kotokelele. Ngeci tungelo va ku va kuatele ku mavoko na mpuevo yeni na vana veni vavali va vampuevo na ku va tuhula ku mbandza ya mbonge nguavo: ‘Tinenu! Kati mu tale ku nima. Nga mu tala ku nima mu tsa!’

Mu va hetele mu mbonge ya Zoale, Yehova ua nokesele tuhia mu mbonge ya Sondoma na Ngomola. Vize vi mbonge vivali via  nongele viose to. Omo mpuevo ya Lote kononokele Yehova na ku tala ku nima, ua himpukile ngundzi ya muongua! Vunoni Lote na vana veni vavali va ovokele muomu vononokele Yehova. Lote hamo na vana veni va liniengele mpueyeni omo kononokele. Vunoni va kele na ndzolela muomu va halakanene vimamuna via Yehova.