Lot mochantik iuaya itío Abraham ipan Canaán. Teipa, Abraham uan Lot kinpixkej miakej tlapialmej uan ayokmo kinaxiliyaya tlen kikuaskiaj inintlapialjuaj. Uajka Abraham kiiljuik Lot: “Ayokmo uelis tiitstosej sansejko. Ma timoxelokaj. Xijtlapejpeni kanke tias uan na nias sejkanok”. ¡Abraham kinextik kipixtoya kuali iyolo!

Lot kiitak nechka altepetl Sodoma eltoya se kuali tlali, kampa onkayaya miak atl uan tlaxoxouixtoya. Yeka yajki mochantito nopaya ininuaya ichampoyouaj.

Nopa maseualmej katli itstoyaj ipan altepetl Sodoma uan altepetl Gomorra kichiuayayaj tlen tlauel amo kuali. Yeka Jehová kiijtok kintsontlamiltiskia katli nopaya itstoyaj. ToTeotsij kinekiyaya Lot uan ichampoyouaj ma momanauikaj, yeka kintitlanki omej iluikaeuanij ma kiniljuikaj: “¡Ximoisiuiltikaj! ¡Xikisakaj uan uejka xiakaj pampa Jehová kitsontlamiltis ni altepetl!”.

Lot amo moisiuiltiyaya. Yeka iluikaeuanij kinmatilantejkej Lot, isiua uan iichpokauaj uan kinkixtijkej, uan kiniljuijkej: “¡Ximotlalokaj para axinmikisej! ¡Amo ximoikankuepakaj! ¡Tlaj inmoikankuepasej, inmikisej!”.

Kema asitoj ipan altepetl Zoar, Jehová kichijki ma uetsi tlitl uan azufre ipan altepetl Sodoma uan altepetl Gomorra. Kintsontlamiltik nopa ome altepemej. Lot isiua amo kichijki tlen Jehová kiniljuijtoya uan  moikankuepki, uan itlakayo mokuepki istatl uan mokajki kej se tetl ijkatok. Lot uan iichpokauaj momanauijkej pampa kineltokakej Jehová. Maske tlauel mokuesojkej pampa Lot isiua amo tlaneltokak, nojkia tlauel yolpajkej pampa inijuantij kena kichijkej tlen Jehová kinnauatik.