Lote ankho ukala na Abraiau, he yomukulu, mo Kanaa. Mokueenda kuomuvo, Abraiau na Lote avakala novipako ovinyingi iya omphangu valisila ankho yahita. Abraiau apopila Lote: ‘Tuhakale atuho pomphangu ike vala. Mbambavo koya oku uhanda okuenda, ame andyiende komphangu onkhuavo.’ Abraiau walekesa oluembia olunene, hatyo?

Lote aovola otyilongo tyikahi nawa popepi nepunda-umbo litiwa Sodoma. Aholovona otyilongo tyina omaande nokuayova nawa. Aende nombunga yae kotyilongo akoya.

Ovanthu vomo Sodoma novo mepunda-umbo likala popepi litiwa Gomora, ankho valinga unene ovivi. Mokonda valinga unene ovivi Jeova apopi okuti mahanyeko omapunda-umbo oo evali. Mahi Huku ankho uhanda okuyovola Lote nombunga yae, atumu onoandyu onombali opo mbuvelondole okuti: ‘Kuluminyei! Tundei mepunda-umbo lino! Jeova melihanye-po.’

Lote ahalingi ngetyi apopilwa. Nkhele asete. Pahe onoandyu ambukuate mokuvoko kwa Lote nokuvoko komukai wae nomo makuvoko ovana vae vevali ambuvekokela kondye yepunda-umbo, ambuti: ‘Hatekei! Hupisei omienyo vienyi muhatalei konyima. Inkha mutala konyima, mamunkhi!’

Etyi vehika mepunda-umbo litiwa Zoar Jeova alokesa otupia atuyokopo epunda-umbo lio Sodoma no Gomora. Omapunda-umbo oo evali ahanyua-po aeho. Omukai wa Lote ehetavela ku Jeova atale konyima atyituka otyimbumba tyomongwa! Mahi Lote novana vae ovahikuena avahupu mokonda vetavela ku Jeova. Tyipondola Lote wanumanene mokonda yomukai wae wehetavelele, tupu novana vanumanene mokonda ya ina wehetavelele. Mahi ankho vena Ehambu mokonda ngwe vetavela ku Jeova.