Looti akaba naatuura na Abrahamu, ishento, omu nsi ya Kanaani. Ku haahingwireho obwire, Abrahamu na Looti bakagira amatungo mingi, kandi hakaba hatariho eitaka eririkubamara. Abrahamu akagambira Looti ati: ‘Titurikubaasa kugumizamu nitutuura hamwe omu mwanya gumwe. Ninkweshengyereza toorana orubaju oru orikwenda, kandi naanye ninyija kutwara orundi.’ Abrahamu akaba atarikweyendeza.

Looti akatoorana ekicweka ekirungi ekyabaire kiri haihi n’orurembo Sodoma. Kikaba kirimu amaizi n’obunyaatsi burungi. N’ahabw’ekyo akatoorana omwanya ogwo kandi yaatwarayo eka ye.

Abantu b’omuri Sodoma n’ab’omu rurembo Gomora orwabaire ruri haihi, bakaba bari babi munonga. Yehova akacwamu kucwekyereza endembo ezo. Kwonka Ruhanga akaba naayenda kukiza Looti n’eka ye, n’ahabw’ekyo akoohereza baamaraika babiri kubarabura bati: ‘Murahukye! Murugye omu rurembo! Yehova ariyo naaza kurucwekyereza.’

Looti tararahukire kugyenda. Akaguma naayeziringa. N’ahabw’ekyo baamaraika bakakwata Looti, omukazi we, n’abahara baabo babiri baabaiha omu rurembo, nibagira bati: ‘Mwirukye! Muhunzye amagara gaanyu, kandi mutareeba enyima. Ku muraareebe enyima, nimuza kufa’!

Ku baahikire omu rurembo orurikwetwa Zoari, Yehova akagwisa omuriro n’obuganga yaacwekyereza Sodoma na Gomora. Endembo ezo zombi zikacwekyerezibwa. Muka Looti ku yaagomiire Yehova  akareeba enyima, akahinduka enyomyo y’omwonyo. Kwonka Looti n’abahara bakaguma bahuriire ahakuba bakoorobera Yehova. Nibabaasa kuba baagizire obusaasi bwingi ahabw’okugira ngu Muka Looti akagoma. Kwonka bakashemererwa ahabw’okugyendera aha buhabuzi bwa Yehova.