Ɛnee Lɔɔto nee ye ankele Ebileham a de Keena azɛlɛ ne azo a. Nzinlii, Ebileham nee Lɔɔto nyianle nyɛmoa dɔɔnwo, yemɔti ɛnee bɛhyia ɛleka kpole mɔɔ bɛbadidi a. Ebileham zele Lɔɔto kɛ: ‘Yɛnrɛhola yɛnrɛdɛnla ɛleka ko. Nea, azɛlɛ ngome ɛne, fa mɔɔ ɛkulo la. Saa ɛ fa bɛne zo a, mebava fema zo.’ Ebileham anyɛ angomedi, ɔnle zɔ ɔ?

Lɔɔto kpale azɛlɛ ne ɛleka mɔɔ le kɛnlɛma na ɔbikye Sodɔm la. Ɛnee nzule nee nya nya wɔ ɛkɛ. Yemɔti ɔ nee ye abusua ne dule hɔdɛnlanle ɛkɛ.

Ɛnee menli mɔɔ wɔ Sodɔm nee Gomɔla mɔɔ bikye bɛ la yɛ ninyɛndane. Nɔhalɛ nu, bɛyɛle ɛtane dedee bɛmaanle Gyihova hanle kɛ ɔsɛkye azua nwiɔ ne. Noko ɛnee Nyamenle kulo kɛ ɔdie Lɔɔto nee ye abusua ne, yemɔti ɔzoanle anwumabɔvolɛma nwiɔ kɛ bɛhɔze bɛ kɛ: ‘Bɛmaa ɔyɛ ndɛ! Bɛvi sua ɛhye azo! Gyihova ɛlɛba arazɛkye sua ne.’

Lɔɔto andu ɔ bo ɛkɛ ne ala. Kɛmɔ ɛnee bɛlɛtwehwe bɛ bo aze la ati, anwumabɔvolɛma ne zɔle Lɔɔto nee ɔ ye nee bɛ mra mraalɛ ne mɔ asa kɛ bɛfa bɛ bɛavi sua ne azo. Bɛhanle bɛhilele bɛ kɛ: ‘Bɛnriandi bɛlie bɛ ngoane! Bɛmmato bɛ nye bɛ nzi anrɛɛ bɛkɛwu!’

Mɔɔ bɛdwule sua bie mɔɔ bɛfɛlɛ ye Zowaa azo la, Gyihova maanle senle nee sɔlefa dɔle Sodɔm nee Gomɔla. Bɛzɛkyele azua nwiɔ ne  bɔkɔɔ. Lɔɔto aye ne yɛle anzosesebɛ dole ɔ nye ɔ nzi na ɛkɛ ne ala ɔhakyile ngyenle pila! Noko Lɔɔto nee ɔ mra ne mɔ nyianle ngoane ɔluakɛ bɛdiele Gyihova. Bie a ɔyɛle bɛ nyane kɛ Lɔɔto aye ne yɛle anzosesebɛ la. Noko bɛ nye liele kɛ bɛdiele Gyihova la.