Lotca paipaj tío Abrahamhuanmi Canaán llajtapi causarca. Paicunaca yallitaj animalcunata charishcamantami chai llajtapica ña mana ishquindij causai tucurcacuna. Chaimantami Abrahamca Lottaca, ‘cunanca ñucamanta chꞌicanyashpa richunmi rogani. Can lluqui ladoman rijpica ñucaca alli ladoman rishallami’ nirca. Abrahamca alli shungu runami carca ¿nachu?

Lot agllashca allpaca Sodoma llajta cꞌuchullapimi carca. Chaipica yacucuna, verdijlla qꞌuihuacunami tiyarca. Paica paipaj familiacunata pushashpami chaipi causanaman rirca.

Sodoma, Gomorra llajtacunapi causajcunaca yallitaj millaita rurajcunami carca. Chaimantami Jehová Diosca, ‘chai llajtacunataca tucuchigrinimi’ nirca. Pero Lotta, paipaj familiatapish quishpichingapajmi ishqui angelcunata cacharca. Angelcunaca, ‘utca cai llajtamanta llujshichij. Cai llajtataca Diosca tucuchigrinmi’ nircacunami.

Pero Lotca mana utca rircachu. Chaimantami angelcunaca Lottapish paipaj huarmitapish ishqui ushushicunatapish maquimanta aisashpa callpashpa llujshichun ayudarca. Angelcunaca, ‘cancunapaj causaita quishpichingapajca callpashpa richij. Ama huashaman tigrashpa ricunguichij. Huashaman ricushpaca huañunguichijmi’ nircacunami.

Lotpish paipaj ushushicunapish Zóar llajtaman chayajpica Diosca Sodoma, Gomorra llajtacunataca azufreta, ninata  cachashpami tucuchirca. Lotpaj huarmica Diosta mana cazushpa huashaman ricushcamantami cachi rumi tucurca. Pero Lotpish paipaj ushushicunapish Diosta cazushcamantami quishpirircacuna. Lotpaj huarmi Diosta mana cazushcamantaca llaquillami sintirishcacuna canga. Pero paicuna Diosta cazushcamantaca tranquilomi sintirircacuna.