Lotpash, paipa tío Abrahanbash Canaán llactapimi causanajurca. Paicuna ashtaca ashtaca animalcunata chari callarijpimi, tucuilla chaipillata causaitaca ñana usharca. Chaimi Abrahanga, Lot runagutaca cashna nirca: ‘Ishcandi causangapaca, alpaca ñana pactanllu’. ‘Can lluqui ladoman rijpica, ñucaca ali ladomanmi risha’ nishpa. Abrahán runaguca ali alimi carca.

Lotca, chai alpacunamanda shuj ladoca juyailla, yacupash, jihuapash ashtaca tiajtami ricurca. Chaimandami paipa familiandi Sodoma llacta ladopi causangapaj rirca.

Sodoma, Gomorra llactacunapi gentecunaca ninan nalicunami carca. Shina nali, millaicuna cajpimi Jehová Diosca chai llactacunata tucuchigrijurca. Shinapash Taita Diosca Lot runaguta, paipa familiatapash salvangapaj munashpami, ishcai angelcunata cacharca. Chai angelcunaca Lottaca nircami: Uchalla ‘cai pushtumanda llujshichi. Diosca cai pueblota tucuchigrinmi’ nishpa.

Shinapash Lot na ucha llujshijpimi Diospa angelcunaca Lotta, paipa huarmita, ushicunatapash maquimanda japishpa chai llactamanda uchalla llujchirca. Shinallata nircami: ‘Calpashpa pacajugrichi. Ama huashaman tigrarishpa ricunguichichu’. ‘Na cashpaca huañunguichimi’ nishpa.

Paicuna Zóar llactaman chayajpica, Jehová Diosca Sodoma, Gomorra llactacunapica azufrehuan rupajuj ninatami tamiachirca. Shinami chai llactacunaca tucuilla tucurirca. Shinapash Lotpa huarmica Jehová Diosta na cazushpami huashaman tigrarishpa ricurca. Shinami paica cachi rumiman tigrarca. Lotpash, paipa ushicunapash Jehovata cazushcamandami salvarirca.  Lotpa huarmi Jehovata na cazushcamanda paicuna llaquilla cashpapash, Jehovata cazushcamandaca tranquilomi sintirirca.