O Lot živindža pe kakoja, e Avrahameja, ki phuv Hanan. Sar nakhlja o vreme, o Avraham hem o Lot hine ljen odobor but životinje so na hine ljen više than sarinendže. O Avraham phendža e Lotese: „Našti više te živina zajedno ko jekh than. Prvo tu birin ki koja strana mangeja te dža, a me ka džav ki aver strana.“ Akava so čerdža o Avraham mothovi so na hine sebično.

O Lot dikhlja soj tani i phuv uzi diz Sodom but šuži. Othe hine but pani hem zeleno čar aso oljese životinje. Odoljese birindža odova than hem dželo peklje porodicaja te živini uduri.

O manuša ando dizja Sodom hem Gomor hine but lošna. On hine odobor lošna so o Jehova odlučindža te uništini akala duj dizja. Ama, o Devel manglja te spasini e Lote hem oljese porodica. Odoljese, bičhaldža duj anđelija hem on phendže ljendže: „Sidžaren! Našen andi akija diz! O Jehova ka uništini la!“

Ama, o Lot na ikljilo odmah ked phendže ljese o anđelija. Odoljese, on doljindže e Lote ando vas, oljese romnja hem oljese dujen čhajen hem ikaldže ljen avri andi diz. Tegani, phendže ljendže: „Prastan! Našen te šaj te spasinen tumen. Hem ma irinen tumen te dikhen palal, ako irinena tumen ka meren!“

Ked reslje ki diz Sigor, o Jehova ando nebo mukhlja jag hem sumpor upro Sodom hem Gomor. Akala duj dizja hine potpuno uništime. Ama, e Lotesi romni na hine poslušno e Jehovase hem  irindža pe te dikhel palal, odoljese ulji stubo ando lon. Ama, o Lot hem oljese duj čhaja spasindže pe odoljese so hine poslušna e Jehovase. Sigurno hine ljendže but pharo so oljengi daj na ačhilji poslušno. Čače tano but važno uvek te šuna odova so vačeri amendže o Jehova.