О Лото жувэлас андо Ханаано пэстирэ какоса лэ Авраамоса. Жалас время и лэндэ ашэля кадя бут бакрэ и авэр ското, кай на хутилэлас важ всаворэ ҭан. О Авраамо ԥэндя лэ Лотости: «Амэндэ будэр на вижал тэ жувас андэ ек ҭан. Мангав тут, витидэ, кай ту камэс тэ жувэс, и жа интя. Ай мэ жава андэ авэр риг». О Авраамо стердя лашимос важ о Лото. Чаче?

О Лото диқля, кай паша форо Содомо фартэ шукарно ҭан. Котэ сас бут паи и зэлэно чар. Важ када во витидя кадэва ҭан и ля тэ жувэл котэ пэстирэ ереса. Прожыля время и во пэрэлагля андо форо.

Андо форо Содомо и андо пашутно форо Гоморра, жувэнас фартэ найлашэ мануша. Вонэ слинэ кацавэ вэрыти, кай о Иегова закамля лэн тэ умарэл. Но о Дэл камля тэ фэрий лэ Лотос и лэстирэ ерес, важ када во бишалдя каринг лэндэ дуен анӷелонэн. Вонэ ԥэндэ лэ Лотости: «Май йто ужантар анда форо! О Иегова йто лэс сԥабарэла».

Но о Лото на грабияспэ тэ ужалтар. Важ када и анӷелоря линэ пала вас лэ Лотос, лэстиря хулая, лэ щеян и май йто виандярдэ лэн анда форо. И анӷелоря приԥэндэ лэнди: «Нашэн! Фэрин пэсти жизня и на обдиқэнпэ палпалэ! Ай сар обдиқэнапэ, тоди мэрэна».

Кала вонэ дожылэ каринг о форо Сиго́ро, о Иегова стердя, кай па нэбо тэ жал яг и сера по форо Содомо и Гоморра. Анда кадэла дуй фороря нисо на ашэляпэ. Но лэ Лотости хулаи на кангля лэ Иеговас. Вой обдиқляпэ палпалэ и ашэля столбо анда лон! Но о Лото и лэстирэ  щея ашэлэпэ жундэ, важ кода кай стердэ, сар ԥэндя о Иегова. Лэ Лотоса и лэстирэ щеянца нисо вэрыто на стердяпэ, важ кода кай вонэ стердэ кадя, сар ԥэндя о Иегова. Сар же лэнди сас ԥарэс, кай о мануш, савэс вонэ фартэ любинас, на кангля лэ Дэвлэс. Кода, со сас, сыкавэл, кай лэ Иеговас трэбуй тэ кандас вся время.