Looxi wosiilisi Abirihaami ledo Kanaani gobbara heeˈrino. Gedensaanni, Abirihaaminna Looxi saada qalante batidhino daafira, gobba ruukkitunsa. Abirihaami Looxi togo yii: ‘Xaate ninke mitteenni heeˈra didandiineemmo. Ati haˈra hasiˈratto raga doodhi; ani ati doodhatto raga agure wolewa hige haˈreemmo.’ Abirihaami hatto yiinohu umisira roorsiˈrannoha ikkinokki daafiraati; dihattooti?

Looxi Soddooma yinanni katami mule noota dancha gobba lai. Hakko lowo wayinna hayisso no. Hakko daafira Looxi minisi manni ledo hakkira haˈri.

Soddoomahonna hakko qooxeessira noohu Gomoora yinanni katamira heeˈranno manni bushuulleho. Hakkiicho heeˈranno manni lowo geeshsha bushuulle ikkino daafira, Yihowa hattee katamma huneemmo yii. Kayinni Maganu Looxinna minisi manna gatisa hasiˈrino; konni daafira lame sokkaasine soyenna insa marte togo yitu: ‘Rakkine konni kataminni fulle! Yihowa konne katama hunaraati!’

Looxi kayinni rahe difulino. Isi hakko keeshshi. Konni daafira, sokkaasine iso, galtesinna lamenka seennesi anga amadde katamunni rakke fultanno gede assitu; qoleno togo yitunsa: ‘Xooqqe! Reyitinannikki gede kawiinni hadhe; badhe higgine laˈinoonte. Badhe higgine laˈiniro reyitinanni!’

Insa Zooaari yinanni katama iillituta, Yihowa Soddoomunna Gomooru katamira giira xeenu gede asse dirrisi. Hakkonne lamenka katama giira  shakki assite ittu. Looxi galte Yihowara hajajama gibbe badhe higge laˈino daafira, maxinete kincho ikkitino! Looxinna seennisi kayinni Yihowara hajajamino daafira gatino. Insa amansa hajajama gibbino daafira lowo geeshsha dadillikki digatino. Ikkollana, insa Yihowa yiinore assino daafira hagiidhino.