Niaraky nipetraky tamy Abrahama ta Kanana tany tse Lota. Nihary biby maro Lota noho dadatoany io. Fe lafa tafara tatoy, le nihamaro bibin-drozy reo ka tsy nitendriky teo sasy. Farany, nivola tamy Lota Abrahama hoe: ‘Fa tsy mety sasy laha miharo tanà tsika. Ka aleo lahy iha mba mifily ze lala teanao hombà, fa ze tsy ombanao ro hombako.’ Tsy hitanao va hoe tsy tea tena Abrahama?

Nahajilo tany soasoa narìny ani-Sodoma eny Lota. Ampy rano soa tany io, sady maro akata mitiry soa. Io ty nifiliny, le nifindra tao ie niaraky amy ty fianakaviany.

Nisy tanà kaihy hoe Gomora zay koa narìny teo. Tena raty fanahy biby ty olo ta Sodoma noho Gomora tao. Farany nivola Jehovah hoe haripakiny tanà reo. Fe ta hanavotsy ani-Lota Jehovah, ka naniraky anjely mba hivola amin-drozy hoe: ‘Mialà amy tanà toy eto! Malaky! Haravani-Jehovah tanà toy.’

Tsy tonga de nandeha Lota, fa mbo nandinindiny. Farany nandesini- anjely rey an-tana rozy morovaly miaraky amy anakampelany roe rey. Nilay baka amy tanà iny ao rozy. Nivola anjely rey hoe: ‘Milaisa malaky soa ho avotsy! Le ka mitolitoliky. Laha mitoliky nareo, le ho maty!’

Lafa niavy tamy tanà atao hoe Zoara zay rozy, le nandatsahani- Jehovah afo noho solifara Sodoma noho Gomora. Rava tanà roe rey! Tsy nanoriky ty safàni-Jehovah valini-Lota iny fa nitoliky, farany  nanjary vongan-tsira. Azo antoky fa nampalahelo ani-Lota noho anakampelany rey raha zay. Fe nanoriky ty raha nivolanini-Jehovah avao rozy, le niavotsy. Soa avao fa nanao ani-zay rozy!