Lot mětẹ̌tanạ dingangi Abraham, su Kanaan. I Lot kai keponakan i Abraham. Ual᷊ingu si Abraham dingangi Lot piạ lawọ binatang, ěntana sene seng nakoạ masěsẹ. Abraham naul᷊ị si Lot, ’I kitẹ seng tawe makapẹ̌tanạ sěngkasio. Pěmilẹe i kau mapulu saranga, iạ hědo sarang tampạ bal᷊inẹ.’ Kawe nụe Abraham tawe kětạeng nẹ̌pikirẹ̌ watangenge hala?

I Lot nakasilo tampạ mapaelẹ̌ maraning soa Sodom. Sene piạ lawọ akẹ dingangu onasẹ̌. I Lot němile tampạ ene, kụ i sie dingangu kěluargane něngal᷊ing sarang ene. Kakạděngụe, i sire nẹ̌tana su Sodom.

Taumata su Sodom sěbạe ral᷊akị, kerene lai taumata su Gomora, soa maraning Sodom. Hakị u ene, Yehuwa mapulu měminasa darua soa ene. Katewe Mawu mapulu měnal᷊amatẹ̌ si Lot dingangu kěluargane. I Sie něngoro darua malaekatẹ̌ gunang pěhabarẹ̌ si sire, ’Lighạe! Sěbang bọu soa ini! Yehuwa sarung měminasa soa ini.’

Katewe, i Lot tawe lighạ siměbang. Hakị u ene, manga malaekatẹ̌ němol᷊eng limang i Lot, kawinge, dingangu darua anạe wawine, kụ nẹ̌bawa si sire siměbang bọu soa ene, apidu naul᷊ị, ’Tal᷊angke tadeạu i kamene masal᷊amatẹ̌! Abe pẹ̌bihu sarang bělakange. Mạeng i kamene mẹ̌bihu sarang bělakange, i kamene sarung mate!’

Su tempong i sire nahumpạ su soa Zoar, Yehuwa napakarěntang tahiti putung dingangu belerang sarang soa Sodom dingangu  Gomora. Darua soa ene nawinasa. Katewe kawing i Lot tawe timuhụ si Yehuwa. I sie nẹ̌bihu sarang bělakange, kụ nakoạ patong asing! I Lot dingangu darua anạe wawine sěbạe nasusah naung. Katewe, i sire nasal᷊amatẹ̌ ual᷊ingu timuhụ si Yehuwa. Hakị u ene, tumuhụ si Yehuwa ene penting.