Lot nixtáa ga̱jma̱a̱ a̱muu Abrahán náa ku̱ba̱ʼ ndrígóo Canaán. A̱jmi̱i̱n ikhiin niguánu niguáʼdiin mbaʼin wéñuʼ xujkhúʼ asndu rí nánguá niʼngo̱o̱ ku̱ba̱ʼ mú makuwá xúgínʼ. Ikha jngó, Abrahán niʼthúu̱n Lot: “Nánguá eʼngo̱o̱ ku̱ba̱ʼ mú makuwáanʼ xúgiáanʼ. Mbá péñu, atraʼwíí náa eyaʼ mi̱dxu̱ʼ ga̱jma̱a̱ ikhúúnʼ maʼgá i̱mba̱ níʼkhá”. Lá ragájkhun rí phú májánʼ a̱jkiu̱u̱n Abrahán ráʼ.

Lot ndiʼyoo mbá chíʼgíʼ ku̱ba̱ʼ dí phú mitsaan, náa phú rígá iyaʼ ga̱jma̱a̱ raxa maxaʼ. Ikha jngó niraʼwíí ikhí ga̱jma̱a̱ ni̱jkha̱ gáxtáa gajmíi̱n bi̱ kuwa náa goʼwóo, mijngii náa mbá xuajin dí mbiʼyuu Sodoma.

Xa̱bu̱ bi̱ kuwa náa Sodoma ga̱jma̱a̱ xuajin Gomorra rí gíiʼ mijngii ni̱ndxu̱ún xkawiinʼ wéñuʼ. Xkawiinʼ wéñuʼ rí asndu Jeobá niʼthí maʼni gámbóo nájma̱ xuajin rúʼko̱. Mú Dios nindoo maʼni kríyaaʼ Lot gajmíi̱n bi̱ kuwa náa goʼwóo, ikha jngó nikuʼmiin a̱jmi̱i̱n angeles muthán rígi̱: “¡Nacha̱! ¡Agajnála náa xuajin rígi̱! ¡Jeobá maʼni gámbóo!”

Mú Lot na̱nguá niʼcho̱o̱ magajnúu, ikha jngó ángeles nirajtuun ñawúunʼ ikhaa, a̱ʼgiu̱u̱ ga̱jma̱a̱ a̱jmi̱i̱n waʼxiooʼ, nirawíin ragañun náa xuajen, nithúún: “¡Agayálaʼ! ¡Agajnála mú xakáñala, ga̱jma̱a̱ xutangáanʼ muyexi tsudií! Á mu nuyexi tsudií, makhañálaʼ”.

Índo̱ niguáʼnu náa xuajin Zóar, Jeobá niʼni rí majngutígú aguʼ ga̱jma̱a̱ azufre náa Sodoma ga̱jma̱a̱ Gomorra. A̱jma̱ xuajin rúʼko̱  niguámbáa mbájkhu. A̱ʼgiu̱u̱ Lot táʼnimbo̱o̱ rí niʼthí Jeobá, nitanga̱a̱ niyexi tsudií ikhú nirtaxi̱i̱ idú. Mú, Lot gajmíi̱n waʼxiooʼ nikáwíin numuu dí ninimbu̱ún. Nikuwa gíná numuu rí a̱ʼgiu̱u̱ Lot táʼnimbo̱o̱, mú ma̱ngaa nidxún numuu rí ninimbu̱ún kuyáá Jeobá.