Lot hela hamutuk ho ninia tiu Abraão iha rai-Kanaan. Maibé Abraão no Lot nia animál sira sai barak no fatin la toʼo ba sira hotu. Abraão dehan ba Lot: ‘Ita labele hamutuk ona iha fatin ida. Favór, ó mak hili uluk fatin neʼebé ó hakarak bá, no haʼu sei bá fatin seluk.’ Abraão la hanoin an deʼit, loos ka lae?

Lot haree ba fatin ida besik sidade Sodoma. Fatin neʼe iha duʼut matak no bee barak. Lot hili fatin neʼe no nia ho ninia família muda ba neʼebá no ikusmai sira hela iha sidade Sodoma.

Ema iha Sodoma mak aat tebes, nuneʼe mós ho ema iha sidade Gomorra neʼebé besik Sodoma. Sira-nia hahalok aat tebes toʼo Jeová deside atu halakon sidade rua neʼe. Maibé Jeová hakarak salva Lot no ninia família, tan neʼe nia haruka anju naʼin-rua atu fó avizu ba sira: ‘Sai husi sidade neʼe! Lalais! Jeová sei halakon sidade neʼe.’

Lot la sai kedas husi sidade, nia demora hela. Tan neʼe, anju sira kaer Lot nia liman, ninia feen no ninia oan-feto naʼin-rua nia liman, no lori sira sai husi sidade. Anju sira-neʼe dehan: ‘Imi tenke halai atu salva imi-nia moris! Keta hateke ba kotuk. Se imi hateke ba kotuk, imi sei mate!’

Bainhira Lot no ninia família halai toʼo iha sidade Zoar, Jeová hatún ahi no enxofre hanesan udan ba Sodoma no Gomorra.  Sidade rua neʼe lakon mohu. Maibé Lot nia feen la halo tuir Jeová. Nia hateke ba kotuk, no sai estátua masin! Lot no ninia oan-feto sira triste tebes tanba Lot nia feen la halo tuir. Maibé sira hetan salvasaun tanba sira halo tuir Jeová. Loos duni, halo tuir Jeová mak importante tebes.