Niharo toboke tamy i Abrahama dadatoa’e ta Kanana agne ty Lota. Nihamaro ty biby nitezae iareo, le tsy tandre ty toeragne nisy iareo sasa. Hoe ty Abrahama tamy i Lota: ‘Tsy afake miharo etoagne sasa tika. Ajafady kahe, jobogno ty toeragne tea’o handehanagne, le ze tsy handehana’o ro handehanako.’ Tsy tea tegna ty Abrahama, sa manao akore?

Nahatrea toeragne soa sady tane misy rano naho feno ahetse maintso ty Lota. Narine ty tanà i Sodoma ty toeragne finili’e, le nifindra tagne miarake amy ty keleia’e reke.

Raty fomba ty ndaty nipetrake ta Sodoma naho ta Gomora tao. Naho ty maregne, le izay ty nahavy i Jehovah nandrava o tanàgne rehoe. Faie te hagnavotse i Lota mirofoko ty Jehovah, le nandefa anjely roe hirehake amy iareo tie: ‘Milaisa malaky nareo, fa horavae i Jehovah ty tanàgne toy.’

Tsy le avy le nandeha ty Lota fa mbe nihisahisa avao. Tinary i anjely rey malaky amy izay iareo mirovaly miroanake mba hiala i tanàgney, le hoe i anjely rey tamy iareo: ‘Milaisa, le avoto ty fiai’areo faie ko mitolitolike nareo tsy ho mate.’

Naho fa niavy tamy ty tanàgne atao tihoe Zoara iareo, le nandefasa i Jehovah afo naho solifara ty tanà i Sodoma naho i Gomora. Tsisy ho tsinimoke i tanàgney. Tsy nankatò i Jehovah i valy  i Lotay. Mbe nitolike reke, le nanjare vongan-tsira. Faie i Lota miroanake ro niavotse satria nankatò i Jehovah. Tsy maintsy nanahelo iareo naho fa tsy nankatò i valy i Lotay. Faie fale iareo fa nagnorike ty fagnanara i Jehovah.