Lot akxtum xtalama xkuku Abrahán anta kxtiyat Canaán. Xchatiykan tsukukgolh malhuwikgo xʼanimaleskan chu nialh xkaʼakchani niku xlamakgo. Wa xlakata Abrahán wanilh Lot: “Nialhla akxtum nalatamayaw. Katlawa litlan, kalaksakti niku napina, chu akit nakan alakatanu”. ¿Nixlikana pi Abrahán lu tlan likatsilh?

Lot akxilhli pi xwi lakatum niku kastlan xwanit, xkgalhi lhuwa chuchut chu xalakxtakni tuwan. Wa xlakata laksakli uma kachikin chu anta alh katalatama xfamilia, lakatsu kkachikin Sodoma.

Latamanin xalak Sodoma chu xalak Gomorra nema lakatsu xwi, lu lixkajni xlikatsikgo. Wa xlakata Jehová lakpuwa nakamasputu umakgolh kachikinin. Pero Dios xkalakgmaxtuputun Lot chu xfamilia, wa xlakata kamalakgachalh chatiy ángeles xlakata xwanikgolh: “¡Lakapala! ¡Kataxtutit k’uma kachikin! ¡Jehová namalakgsputu!”.

Pero Lot ni tunkun alh, wata tamakgapalilh. Wa xlakata ángeles makgachipakgolh Lot, xpuskat chu xlaktsuman chu lakapala kamaxtukgolh kkachikin. Kawanikgolh: “¡Kakgosnantit! ¡Katsalatit xlakata ni naniyatit chu ni katalakgaspittit! Komo natalakgaspitatit, naniyatit”.

Akxni chankgolh kkachikin Zóar, Jehová tlawalh pi xtaktalh lhkuyat chu azufre anta kSodoma chu kʼGomorra. Uma akgtiy kachikin kamasputukgoka. Xpuskat Lot ni kgalhakgaxmatli Jehová,  talakgaspitli chu matsat lalh. Pero Lot chu xlaktsuman lakgtaxtukgolh xlakata kgalhakgaxmatnankgolh. Xlikana, max lu lilipuwankgolh xlakata xpuskat Lot ni kgalhakgaxmatnalh, pero na tlan xmakgkatsikgo xlakata xlakan xkgalhakgaxmatkgonit Jehová.