Lot i stap wantaim Abraham, ankol bilong em, long graun bilong Kenan. Bihain, Abraham na Lot i gat planti animal na i no gat inap graun bilong olgeta animal. Abraham i tokim Lot: ‘Yumi no inap stap wantaim long wanpela ples. Plis, makim wanem hap graun yu laikim na yu ken i go, na mi bai go long narapela sait.’ Abraham i no tingim em yet, a?

Lot i lukim naispela hap graun klostu long taun Sodom. I gat planti wara na grinpela gras. So em i makim dispela ples na kisim famili bilong em i go long hap.

Ol man bilong Sodom na taun i stap klostu em Gomora, ol i man nogut tru. Ol i mekim pasin nogut tru so Jehova i tingting long bagarapim ol dispela taun. Tasol God i laik seivim Lot na famili bilong em, olsem na em i salim tupela ensel i go givim tok lukaut long ol: ‘Hariap! Lusim dispela taun! Jehova bai bagarapim taun.’

Lot i no lusim taun wantu. Em westim taim i stap. So ol ensel i holim han bilong Lot, meri bilong em, na tupela pikinini meri na kisim ol i go hariap lusim taun, ol i tok: ‘Ran! No ken tanim na lukluk i go bek. Sapos yupela lukluk i go bek, yupela bai dai!’

Taim ol i go kamap long taun Soar, Jehova i salim salfa na paia i kam daun olsem ren long Sodom na Gomora. Dispela tupela taun i bagarap olgeta. Taim meri bilong Lot i sakim tok bilong  Jehova na lukluk i go bek, em i tanim i kamap pos sol! Tasol Lot na ol pikinini meri bilong em i seif bikos ol i bihainim tok bilong Jehova. Ating ol i bel hevi tru long meri bilong Lot i sakim tok. Tasol ol i amamas olsem ol i bin bihainim ol instraksen bilong Jehova.