Loti akaba n’ayeta Iburahimu isento, kandi bakaba nibaikara hamu omu Kanani. Obwire bukahika ebisoro bya Iburahimu na Loti byakanya muno bayesanga bataine itaka erikumara ery’okwikaraho. Iburahimu akagambira Loti: ‘Titukyasobora kwikara hamu omu kiikaro kimu. Ninkusaba okomemu nambere orukugonza kugenda nukwo nanyowe ndagenda ha rubaju orundi.’ Orozere omulingo Iburahimu akaba n’afaho abantu abandi atarukwefaho wenka?

Loti akarora ekiikaro ekiri haihi n’orubuga rwa Sodomu kiri kirungi muno. Hakaba haliyo amaizi maingi hamu n’ebinyasi ebirungi. Kinu nikyo kiikaro Loti yakomeremu kandi yagenda uwe n’eka ye kwikarayo.

Abantu ab’omu rubuga runu orwa Sodomu n’orubuga orukaba ruli haihi orukwetwa Gomora bakaba bantu babi muno. Kumanya baali babi muno, Yahwe akacwamu kuhwerekereza embuga zinu zoona. Baitu Ruhanga akaba nagonza kujuna Loti n’eka ye, nahabweki akatuma abamaraika babiri kubahabura bati: ‘Mwanguhe! Muturuke orubuga runu! Yahwe n’agenda kuruhwerekereza.’

Loti atanguhe kurugamu. Akaikara nayetororatorora. Abamaraika bakacwamu kukwata omukono gwa Loti, mukazi we, hamu n’abahara be babiri babanguhya kubaturukya omu rubuga nibagamba: ‘Mwiruke! Mujune obwomeezi bwanyu kandi mutarora enyuma. Obu murarora enyuma nimwija kufa!’

Obu bahikire omu rubuga orukwetwa Zoara, Yahwe akasindika omurro gw’amaani muno kuruga omu iguru gwayokya Sodomu na Gomora.  Embuga zinu ibiri zikahwerekerra zahwaho. Omukazi wa Loti obu yajemiire Yahwe yarora enyuma, akafooka enyomyo y’ekisura! Baitu Loti n’abahara be bakakira habwokuba bakorobera Yahwe. Mukazi wa Loti obu yajemiire Yahwe kikabasaliza muno. Baitu Loti n’abahara be bakahurra basemeriirwe habw’okworobera oburagirizi bwa Yahwe.