Лот Ханаан деп черге даайы Авраам-биле чурттап турган. Чоорту оларның мал-маганы көвүдеп эгелээрге, оларга чер чедишпес апарган. Авраам Лотка: «Бис ам кады чурттап шыдавас бис, ынчангаш каяа чурттаксаар-дыр сен, ону шилип алгаш, ынаар чорувут. А мен өске талазынче чоруптар мен» — дээн. Авраам дыка шын алдынган эвес-тир бе?

Лот Содом хоорайның чанында черни аажок чарашсынган. Ында оът-сигенниг, суглуг черни шилип алгаш, өг-бүлези-биле аңаа чурттай берген. Чоорту ол Содомче көже берген.

Содомнуң болгаш ооң кожазы Гоморра хоорайның чурттакчылары дыка багай улус турган. Олар эмин эрттир каржы боорга, Иегова ол ийи хоорайны узуткаар дээн. Ынчалза-даа Бурган Лотту база ооң өг-бүлезин камгалаар дээш, ийи ангелин чоргузупкан. Олар Лотка: «Дүрген хоорайдан үнүңер! Удавас Иегова ону узуткаар деп барды!» — дээн.

Ынчалза-даа Лот далашпаан. Ынчангаш ангелдер Лоттуң холундан чедип алгаш, ооң кадайын, уругларын хоорайдан дыка дүрген үндүрүп эккелген. Ангелдер оларга: «Дезиңер! Камгаланыңар! Хая көрүнмеңер, бир эвес хая көрнүптер болзуңарза, өлүп каар силер!» — дээн.

Олар Сигор хоорайга чеде бээрге, Иегова Содом биле Гоморраже дээрден оттуг күгүрнү чаъс дег дүжүрүпкен. Ол ийи хоорай  бүрүнү-биле узуткаттырган. Лоттуң кадайы Иеговага дыңнангыр болбаан. Ол хая көрнүпкеш, дус көжээ бооп хуула берген! А Лот болгаш ооң уруглары Иеговага дыңнангыр болгаш, дириг арткан. Оларга эргим кижизи дыңнангыр эвес боорга, кайы хире аарышкылыг болган деп! Бо төөгүден Иеговага кезээде дыңнангыр болуру чугула деп көскү.