Li Lote jmoj toʼox nakalik ta Kanaan xchiʼuk li stio ti jaʼ li Abraane. Epaj batel li chonbolometik yuʼunike, jech mu xa ox x-och skotolik li ta osil bu oyike. Jaʼ yuʼun li Abraane, xi laj yalbe li Lote: «Jaʼ lek jvokʼ jbatik batel, avokoluk tʼujo bu jotukal chakʼan chabat, mi voʼot chabat ta xokon slokʼeb kʼakʼal ta nortee, voʼon chibat ta xokon smaleb kʼakʼal ta sur». ¿Mi mu jechuk ti toj lek yoʼonton echʼ li Abraane?

Li Lote la sta ta kʼelel ta nom ti oy jsep osil ti toj kʼupil sbae, yuʼun oy lek voʼ xchiʼuk naka yaxal tsʼiʼleletik te. Jaʼ yuʼun jaʼ te bat nakiuk li Lot xchiʼuk yutsʼ yalale, taje te nopol xil li lum Sodomae.

Pe li krixchanoetik ta Sodoma xchiʼuk li ta lum Gomorra ti te noʼox nopol xilike, toj echʼ noʼox chopolik tajek. Jaʼ yuʼun li Jeovae la snop la slajes li chib lum taje. Pe li Jeovae mu skʼan ti te xchamik li Lot xchiʼuk yutsʼ yalele. Jaʼ yuʼun li Jeovae la stak batel chib anjeletik ta stojolal Lot sventa xi xalbeike: «¡Lokʼanik batel, yuʼun li Diose ta slajes li lum liʼe!».

Pe li Lote muʼyuk bu lokʼ batel ta anil. Jech te nitbil lokʼik batel yuʼun anjeletik li Lot, yajnil xchiʼuk li chib stsebetike. Xi albatike: «¡Batanik ta anil yuʼun jech mu xachamik mu me xakʼel sutel apatik!».

Kʼalal kʼotik li ta lum Soar li Lot xchiʼuk stsebetike, li Jeovae laj yakʼ tal kʼokʼ xchiʼuk asufre li ta lum Sodoma xchiʼuk Gomorrae. Li chib lum taje lajem tajek kom. Pe li yajnil Lote muʼyuk bu la xchʼun li kʼusi laj yal  Jeovae yuʼun la skʼel sutel svalopat, jech kʼataj ta tanal atsʼam. Yan li Lot xchiʼuk stsebetake, kuxul komik ta skoj ti la xchʼunik mantale. Laj onoʼox yat yoʼontonik li Lot xchiʼuk stsebetik ti muʼyuk la xchʼun mantal li yajnile, pe akʼo mi jech xkuxet yoʼontonik li stukike yuʼun la xchʼunbeik smantal li Jeovae.