Loto o vha a tshi dzula na Abrahamu, khotsi-muhulu wawe, shangoni ḽa Kanana. Mafheleloni, Abrahamu na Loto vho vha na zwifuwo zwinzhi lwe ha si tsha vha na pfulo yo linganaho. Abrahamu a ri kha Loto: ‘A ri tsha kona u dzula roṱhe fhethu huthihi. Ndi humbela uri ni nange hune na ṱoḓa u ya hone nahone nṋe ndi ḓo ya thungo iṅwe.’ Abrahamu o vha e si na tseḓa, a si zwone?

Loto o vhona tshipiḓa tsha shango ḽavhuḓi tsini na muḓi wa Sodoma. Ho vha hu na maḓi manzhi na hatsi vhudala. Nga zwenezwo, a khetha henefho nahone a pfulutshela hone na muṱa wawe.

Vhathu vha Sodoma na muḓi wa nga tsini wa Gomora vho vha vhe vhavhi vhukuma. Vho vha vhe vhavhi nga maanḓa lwe Yehova a phetha u fhelisa yeneyo miḓi mivhili. Fhedzi Mudzimu o vha a tshi ṱoḓa u tshidza Loto na muṱa wawe, ngauralo a rumela vharuṅwa vhavhili uri vha vha vhudze nga ha khombo: ‘Ṱavhanyani! Ibvani kha uno muḓi! Yehova u khou ḓo u fhelisa.’

Loto ho ngo bva nga u ṱavhanya. O ita zwa u lenga-lenga. Nga zwenezwo, vharuṅwa vha fara Loto, mufumakadzi wawe na vhananyana vhawe vhavhili nga tshanḓa nahone vha vha bvisela nnḓa ha muḓi nga u ṱavhanya, vha ri: ‘Shavhani! U itela u tsireledza vhutshilo haṋu nahone ni songo sedza murahu. Arali na sedza murahu ni ḓo fa!’

Musi vha tshi swika muḓini wa Tsowari, Yehova a nisa tsevhela na mulilo kha Sodoma na Gomora. Yeneyo miḓi mivhili yo fheliswa tshoṱhe. Mufumakadzi wa Loto ho ngo thetshelesa Yehova nahone a  sedza murahu, o mbo ḓi shanduka a vha tshiunga tsha muṋo! Fhedzi Loto na vhananyana vhawe vho tsireledzea ngauri vho thetshelesa Yehova. Vha nga vha vho vha vho ṱungufhala vhukuma ngauri mufumakadzi wa Loto ho ngo thetshelesa. Fhedzi vho vha vho takala ngauri vho thetshelesa zwe Yehova a vha vhudza.