Hi Lot nag-ukoy ha Canaan kaupod han iya batâ nga hi Abraham. Inabot an panahon, nagdamu an hayop nira Abraham ngan Lot, ngan waray na igo nga lugar para hito ngatanan. Hi Abraham nagsiring kan Lot: ‘Diri na kita puydi mag-upod ha usa nga lugar. Alayon pagpili kon diin mo karuyag kumadto, ngan makadto ako ha iba nga dapit.’ Diri gud makikalugaringon hi Abraham, diri ba?

Nakita ni Lot an usa nga maopay nga bahin han tuna hirani han syudad han Sodoma. Damu an tubig hito ngan berde nga mga banwa. Salit iya ito ginpili, ngan bumalhin hiya didto upod an iya pamilya.

Maraot hinduro an mga tawo ha Sodoma ngan ha kahirani nga syudad hito, an Gomorra. Ngani, tungod han ira sobra nga karaot, nagdesisyon hi Jehova nga bungkagon ito nga mga syudad. Pero karuyag han Dios talwason hi Lot ngan an iya pamilya, salit nagsugo hiya hin duha nga anghel basi pahamangnoan hira: ‘Pagdagmit! Gawas kamo hini nga syudad! Bubungkagon ini ni Jehova.’

Waray dayon bumaya hi Lot. Naglangan hiya. Salit ginbutong han mga anghel an kamot ni Lot pati han iya asawa ngan han iya duha nga anak nga babaye, ngan igin-gawas dayon hira ha syudad, ngan nagsiring: ‘Dalagan kamo! Talwasa an iyo kinabuhi ngan ayaw paglingi. Kon lumingi kamo, mamamatay kamo!’

Pag-abot nira ha syudad han Soar, ginpauranan ni Jehova hin kalayo ngan asupre an Sodoma ngan Gomorra. Nabungkag inin duha nga  syudad. Han waray sumugot kan Jehova an asawa ni Lot ngan lumingi, nagin harigi hiya nga asin! Pero hi Lot ngan an iya mga anak natalwas tungod kay sumugot hira kan Jehova. Posible nga nasubo gud hira kay waray sumugot an asawa ni Lot. Kondi nalipay hira kay namati hira ha mga instruksyon ni Jehova.