Loti ŵatamaga ni mjombagwe, Abulahamu, m’cilambo ca Kanani. Mkupita kwandaŵi, yilango ya Loti ni Abulahamu yatupile mwamti nganakola malo gakwanila. Ni Abulahamu ŵamsalile Loti kuti, ‘Nganituŵa tutemi pamalo gamo. Msagule malo gampaka mganonyele, une cinjawule mbali jinejo.’ Yeleyitu yikulosya kuti Abulahamu jwaliji jwangalinonyela, ngati m’yoyo?

Loti ŵagaweni malo gane gakusalala mnope ciŵandika msinda wine wakolanjidwa kuti Sodomu. Kumaloko kwaliji mesi gejinji soni mopo wambone. Jwalakwe ni liŵasa lyakwe ŵasamile kumalo gelego.

Ŵandu ŵa mu Sodomu soni msinda wine wakuŵandikana nawo wa Gomola ŵaliji ŵakusakala mnope, mwamti Yehofa ŵasakaga konanga misinda josopeji. Nambope Mlungu ŵasakaga kumkulupusya Loti ni liŵasa lyakwe ni jwatumisye malayika gaŵili kuti gakamkalamusye. Malayikago gamsalile jwalakwe kuti, ‘Mtende citema! Mkopoce mumsindawu! Yehofa akusaka kuwujonanga.’

Loti nganakopoka mumsindamo mwacitema. M’yoyo, malayikago gamkamwile jwalakwe, ŵamkwakwe soni ŵanace ŵakwe ŵaŵili ŵala ni kwakoposya mumsindamo mwacitema. Gasalile ŵanduwo kuti, ‘Atile! Akulupusye umi wawo, soni akalola munyuma. Naga akulola munyuma cawe!’

Jemanjaji ali ayice mu msinda wakolanjidwa kuti Sowali, Yehofa ŵagwicisye moto ni sulufule kutyocela kwinani ni konanga misinda ja Sodomu ni Gomola. Nambo ŵamkwakwe Loti nganapikanila Yehofa ni  ŵalolite munyuma kaneko ŵasucile lisugulu lya njete. Nambo Loti ni ŵanace ŵakwe ŵala ŵakulupwice ligongo ŵampikanile Yehofa. Jemanjaji komboleka kuti cakamwile canasa ligongo lyakuti ŵamkwakwe Loti nganapikanila. Nambope ŵasangalele ligongo ŵapikanile malamusi ga Yehofa.