Lot ne xtiube Abrahán gulézacaʼ guidxi Canaán. Bizulú bidale ca maniʼ stícabe dede maʼ gastiʼ lugar para laacame. Ngue runi gudxi Abrahán Lot: «Maʼ qué zanda guiaananu ti lugar si. Gulí pa ladu cheluʼ, pa cheluʼ ti ladu la? naa ziaaʼ sti ladu». ¿Cadi dxandíʼ guizáʼ nachaʼhuiʼ guca Abrahán la?

Biiyaʼ Lot guizáʼ galán ti ndaa de layú que, nuu guixi gáʼ ne ziáʼ nisa. Ngue runi gulibe lugar que ne bireenebe familia stibe, yendézacabe raqué gaxha de ti guidxi láʼ Sodoma.

Nabé malu ca binni de Sodoma ne sti guidxi nuu gaxha ni láʼ Gomorra. Cumu guizáʼ malu laacabe guníʼ Jiobá zunitilú guiropaʼ guidxi riʼ. Peru Dios racalaʼdxiʼ gulá Lot ne familia stiʼ, ngue runi biseendaʼ chupa ángel stiʼ para gabi laacabe: «¡Nagueenda! ¡Laguiree de ndaaniʼ guidxi riʼ! ¡Chigunitilú Jiobá ni!».

Peru qué niree Lot oraqueca ne cumu candaabe la? gunaazeʼ ca ángel que nabe, náʼ xheelabe ne ca xiiñidxaapabe ne ziguxooñenecaʼ laacabe para bireecabe de ndaaniʼ guidxi que. Ne gúdxicaʼ laacabe: «¡Laguxooñeʼ! ¡Laguiree de raríʼ para cadi gátitu, ne cadi gudxiguetalutu atrá! Purtiʼ pa gudxiguetalutu atrá la? zátitu».

Ora yendácabe guidxi Zoár, bisaba Jiobá bele ne azufre ndaaniʼ guidxi Sodoma ne Gomorra. Zaqué binitilú guiropaʼ guidxi que. Peru xheelaʼ Lot qué nuzuubaʼ stiidxaʼ Jiobá, bidxiguetalú atrá, ngue runi  gúcabe ti estatua de zidi. Peru bilá Lot ne ca xiiñiʼ purtiʼ bizuubacaʼ diidxaʼ. Guizáʼ guyuucabe triste purtiʼ qué nuzuubaʼ xheelaʼ Lot diidxaʼ, peru guyuudxí ladxidóʼcabe purtiʼ laacabe bizuubacabe stiidxaʼ Jiobá.