Lot bibanybu toibsi né bixiobu Abrahán lagary ni góc laa Canaán. Guiropcayibu gosaló bidal xinimalyibu né ma diti goyoʼ lagary par natoplogyimu. Por ngú Abrahán gochbu Lot: «Ma diti labúu cuésno toibsi lagary. Ranába looy, golú niis púti nainy looy tzeelo, né naʼ tzaʼya niis stoib lad». ¿Buñtzayxat góc Abrahán ja?

Lot bibiʼ que noʼ tlaʼ layoo ro nigolú sacró nac, gopni nís né guixaʼ. Por ngú, golúbu lagarycu né goylésbu niscú né xfamilybu, lagarycu goyoʼni gahxca Sodoma.

Buñ ni bibany Sodoma né Gomorra gocyibu buñ mal por ngú Jehová goniʼ guinitló guiropca gudxcú. Per Dios goniiny nalaabu Lot né xfamily, por ngú bixelbu chop ángeles nigudxyibu Lot: «¡Naguelsi! ¡Colguireʼ de lagary reʼ! ¡Jehová sanitló láani!».

Per Lot diti bireʼ nimaca, xalagary ngú goclarabu. Ór cú chop ángelescu gonás ñayibu né goleʼ layibu de Sodoma. Né goniʼyibu: «¡Colguixony! ¡Colguixony par diti gaityto, né diti guidxiguetto lóto! Pal guidxinayto lóto, saityto».

Órni bidxinyibu toib gudx ni laa Zóar, Jehová bisiab guii né azufre ronoʼ Sodoma né Gomorra. Guidopynac gudxcú  binitlóni. Tzeʼel Lot diti bisobdiitzbu Jehová, bidxiguetbu lóbu né gócbu toib pilary de suudy. Per Lot né guiropca xiindzap bilaa portín bisobdiitzyibu Dios. Lot goyoʼ nabann portín goity tzeelbu, né guiropca xiindzapbu láaca goyoʼ nabann. Per láaca goyoʼ nakityibu portín bisobdiitzyibu Jehová.