Jehová Diosar munasiñapataki, taqe promesanakapar confiyañapatakiw Abrahanajj Isaac wawapar yatichäna. Isaacajj niya 25 maranëjjänwa, ukhaw Jehová Diosajj Abrahanar may lurañap mayïna. ¿Kunsa lurañapäna uk yattati?

Diosajj akham sänwa: ‘Mirä amp suma, Moria sat qollun munat yoqamar sacrificiot loqtita’ sasa. Kunatsa Diosajj ukham mayïna uk janiw Abrahanajj yatkänti, ukhampachas Diosar istʼänwa.

Qhepürojj wali alwatwa Abrahanajj Isaacampi pä servirinakapampi Moria qollur sarapjjäna. Kimsa uruw sarjjapjjäna ukhaw jayat qollunak uñjapjjäna. Abrahanajj servirinakapar jayttʼasajj Isaacampikiw sacrificio loqtirejj sarapjjäna. Abrahanaw cuchillo apäna, Isaacasti lawanakwa nin nakhayañatakejj aparakïna. Isaacajj akham sasaw tatapar säna: ‘Janirakis kuna ovejas utjkitejjä, ¿kunsa Diosar sacrificiot loqtaniñäni?ʼ sasa. Abrahanajj akham sarakïnwa: ‘Wawa, Jehová Diosaw churistani’ sasa.

Qollur purisajj mä altar lurapjjäna. Ukatjja Abrahanajj Isaacaruw amparampit kayumpit chinuntäna, altar patjjaruw apjjatarakïna.

Abrahanajj cuchillo aptaskäna, ukhamaruw Jehová Diosan angelapajj alajjpachat akham sanïna: ‘¡Abrahán! ¡Wawamarojj jan kuns luramti! Diosar taqe chuyma confiyatam nayajj yatjjtwa, mä sapa yoqamaru sacrificiot churañatakejj janiw jumajj  janiw sisktati’ sasa. Ukhamaruw Abrahanajj mä orqo oveja uñjäna, alinakar wajjranakat achuntata. Ukatjja jankʼakiw Isaacar jararäna. Wawap lantejj uka ovejwa sacrificiot loqtäna.

Uka urutwa Abrahanajj Jehová Diosan amigopäjjäna. ¿Kunatsa? Abrahanajj taqe kunanwa Jehová Diosar istʼirïna. Janis kunatsa Diosajj ukham mayïna uk amuykchïnjja, jupajj istʼaskakïnwa.

Jehová Diosajj wasitampiw Abrahanar akham säna: ‘Nayajj bendisïmawa, wawanakamas waljarakïniwa’ sasa. Jehová Diosajj ‘familiam taypiw walja suma jaqenakajj bendisitäpjjani’ sasaw sarakïna.