Abraham a bi niiga lok yé Isak i gwés Yéhôva ni i bôdôl mimbônga nwé nwominsôna ñem. Ndi ngéda Isak a bééna jam kiki bo 25 nwii, Yéhôva a bat Abraham le a boñ ngim jam li li bé ndutu ngandak. Limbe li jam?

Djob a kal Abraham le: ‘Soho, yoñ mpom woñ man munlôm le Isak, u ti nye kiki sesema i ngii hikôa hiada i loñ Môria.’ Abraham a bé yi bé inyuki Yéhôva a bi bat nye le a boñ hala. Ndi to hala a bi nôgôl Yéhôva.

I kel i bé noñ, tutu bikegla, Abraham a yoñ Isak ni minkol ima, ba yoñ njel i Môria. I mbus dilo daa, ba pa mis, ba tehe dikôa nyoo haa. Abraham a kal minkol nwé le ba bémél bo ha. Nye ni hiloga, ba nke i ti Djob sesema. Abraham a bééga man wé Isak tjéé, Abraham a yoñ ngwende. Isak a bat isañ le: ‘Hee lém di ga ti kiki sesema i yé?’ Abraham a timbhe nye le: ‘A man wem, Yéhôva a ga ti yo.’

Ngéda ba bi sôk pam i hikôa, ba oñ juu li sesema. I mbus, Abraham a kañ Isak moo ni makôô, a niñi nye ngii juu ba bi oñ.

Abraham a yoñ ngwende. Nlélém ngéda añgel i Yéhôva i nsébél nye i kal nye le: ‘A Abraham! A Abraham! U boñ bañ hiloga hini béba! Nano,  me nyi le u nhémle Djob, inyule u ntjél bé ti me man woñ kiki sesema.’ Abraham a pa mis, a tehe nlôm ntômba a ngwiya mintjep mi man e. A pala hohol Isak, inyu ti nlôm ntômba kiki sesema.

Ibôdôl kel i nyen, Yéhôva a kal le Abraham a yé liwanda jé. Baa u nyi inyuki? Abraham a bé boñ to kii Yéhôva a bé bat nye le a boñ, yak ngéda a bé nok bé inyuki Yéhôva a mbat nye le a boñ hala.

Yéhôva a bi tiimba hôñlaha Abraham mbônga wé: ‘Me ga sayap we, me ga bulus ki bon boñ, tole mbôda yoñ.’ Hala a nkobla le Yéhôva a bé lama sayap biloñge bi bôt gwobisôna ni njel lihaa li Abraham.