Diajari si Abraham do si Isak asa mangkaholongi Jahowa jala porsea tu janji ni Jahowa. Tingki marumur 25 taon si Isak, dipangido Jahowa ma si Abraham asa mangulahon ulaon na maol. Aha ma i?

Didok Debata ma tu si Abraham, ‘Boan ma anakmi jala bahen ma ibana gabe persembahan di dolok Moria.’ Nang pe ndang diboto si Abraham boasa dipangido Jahowa songon i, dioloi ibana do Jahowa.

Manogotna i, diboan si Abraham ma si Isak dohot dua pangurupina tu dolok Moria. Dungkon pardalanan tolu ari, tarida ma dolok i sian na dao. Didok si Abraham ma tu pangurupina asa paimahon nasida disi. Dung i, mardalan ma ibana muse dohot si Isak laho mangalehon persembahan. Disuru si Abraham ma si Isak mamboan soban. Jala diboan si Abraham ma piso. Disungkun si Isak ma bapakna, ‘Dia do binatang na laho tapersembahon i Bapa?’ Dialusi si Abraham ma, ‘Diparade Jahowa do i annon Anakku.’

Dung sahat nasida di dolok i, dibahen nasida ma mezbah. Dung i, diingkat si Abraham ma tangan dohot pat ni si Isak, jala dipeakkon ma ibana di mezbah i.

Alai tingki naeng diseat si Abraham si Isak, dijou suru-suruan manang malaikat ni Jahowa ma ibana, ‘Abraham! Unang seat anakmi! Saonari nunga huboto porsea do ho tu Debata. Alana, olo do ho mangalehon anakmi gabe persembahan.’ Dung i, diida si Abraham ma  sada domba jantan na sangkot tandukna di hau na gelleng. Hatop ma dibungka ibana tali ni si Isak i, jala dipersembahon ma domba i.

Mulai sian i, didok Jahowa ma si Abraham sahabatna. Diboto ho do boasa didok songon i? Ala diulahon si Abraham do sude parenta ni Jahowa, nang pe ndang diantusi ibana boasa disuru Jahowa ibana mangulahon i.

Didokkon Jahowa do muse janjina tu si Abraham, ‘Pasu-pasuonku ma ho, jala godang ma ianakhonmu, manang pinomparmu.’ Dung i marjanji ma muse Jahowa, na laho pasu-pasuonna sude halak na burju di liat portibi on marhite sahalak sian pinompar ni si Abraham.