Abraamun seli i wa Izaaki kɛ maan ɔ klo Zoova, yɛ ɔ lafi like kwlaa nga Zoova se kɛ ɔ́ yó’n su. Kɛ Izaaki ɲannin afuɛ ablaɔn- nin-nnun’n (25), Zoova seli Abraamun kɛ ɔ yo like kun mɔ i yolɛ timan pɔpɔ’n. ?A si like sɔ’n?

Ɲanmiɛn seli Abraamun kɛ: ‘Yaci, ɔ wa Izaaki m’ɔ ti ɔ wa kunngba cɛ’n, fɛ i kɔ Moriza mɛn’n nun lɔ ko yi tɛ man min.’ Abraamun siman sa nga ti yɛ Zoova seli i kɛ ɔ yo sɔ’n. Sanngɛ i ɲin yili Zoova.

Kɛ aliɛ cɛnnin’n, nglɛmun ndɛ kpa’n, Abraamun fali Izaaki nin i junman difuɛ nɲɔn, kpɛkun be fali Moriza atin’n. Kɛ be dili cɛn ba nsan atin’n su’n, be wunnin oka mun mmua lɔ. Yɛ Abraamun seli i junman difuɛ mun kɛ be minndɛ i naan ɔ nin Izaaki bé kó yí tɛ bé bá. Abraamun fali yie’n mannin Izaaki, kpɛkun i bɔbɔ fali laliɛ’n. Izaaki usɛli i si kɛ: ‘?Nnɛn nga é fá yí tɛ’n o nin?’ Abraamun tɛli i su kɛ: ‘Min wa, Zoova bɔbɔ yɛ ɔ́ mán e nnɛn’n niɔn.’

Kɛ be juli oka’n su lɔ’n, be siesieli tɛ yiwlɛ kun. Abraamun cili Izaaki i sa nin i ja mun. Kpɛkun, ɔ fɛ i sieli i tɛ yiwlɛ’n su.

Kɛ Abraamun mannin laliɛ’n su cɛ’n, Zoova i anzi kun m’ɔ o ɲanmiɛn su lɔ’n flɛli i. Ɔ seli i kɛ: ‘Abraamun!  Nán kun ba’n. Siɛn’n, m’an wun kɛ a lafi Ɲanmiɛn su sakpa. Afin, a kplinnin su kɛ á fá ɔ wa’n yí tɛ.’ Kɛ ɔ yoli sɔ’n, Abraamun nían-ɔn, bua kun yɛ i wɛ’n w’a sata susrɛ’n nun yɛ. Abraamun ɲannjili Izaaki ndɛndɛ kpa, kpɛkun ɔ fali bua’n yili tɛ’n.

Kɛ ɔ fɛ i lɛ’n, Zoova flɛli Abraamun kɛ i janvuɛ. ?A si sa ti’n? Like kwlaa nga Zoova se Abraamun kɛ ɔ yo’n, kannzɛ ɔ siman sa nga ti yɛ Zoova se i kɛ ɔ yo’n, sanngɛ ɔ yo.

Like nga Zoova seli kɛ ɔ́ yó mán Abraamun’n, ɔ kɛnnin i ndɛ ekun. Ɔ seli i kɛ: ‘Ń má yrá ɔ su. Ń yó maan ɔ mma mun bé sɔ́n kpa.’ Ndɛ sɔ’n kle kɛ Abraamun dunman nun’n, Zoova wá yó sran kpa mun be ye.