Abraham tsɔɔ ebinuu Isak Yehowa he nii. Enɛ hewɔ lɛ, Isak basumɔ Yehowa. Ená hemɔkɛyeli akɛ Yehowa shiwoi lɛ fɛɛ baaba mli. Shi be ni Isak ye aaafee afii 25 lɛ, Yehowa kɛɛ Abraham ni eyafee nɔ ko. Nɔ ni ekɛɛ eyafee lɛ wa waa. Ani ole nɔ ni ji?

Nyɔŋmɔ kɛɛ Abraham akɛ: ‘Ofainɛ, yaa gɔŋ ko ni yɔɔ Moria shikpɔŋ lɛ nɔ lɛ nɔ, ni okɛ obi koome lɛ ayashã afɔle yɛ jɛmɛ.’ Abraham leee nɔ hewɔ ni Yehowa kɛɛ eyafee nakai. Fɛɛ sɛɛ lɛ, ebo Yehowa toi.

Enɔ jetsɛremɔ leebi mra lɛ, Abraham, Isak, kɛ amɛtsuji enyɔ yi gbɛ akɛ amɛmiiya Moria. Amɛnyiɛ gbii etɛ, dani amɛna gɔji lɛ yɛ shɔŋŋ. Abraham kɛɛ tsuji enyɔ lɛ akɛ, amɛmɛ lɛ, ejaakɛ ekɛ Isak miiya amɛyashã afɔle. Abraham hã Isak lai ni etere, ni lɛ hu ekɔ kakla. Isak bi epapa akɛ: ‘Nɛgbɛ kooloo ni wɔkɛbaashã afɔle lɛ yɔɔ?’ Abraham kɛɛ lɛ akɛ: ‘Mibi, Yehowa baatsɔɔ.’

Be ni amɛshɛ gɔŋ lɛ nɔ lɛ, amɛma afɔleshãa latɛ yɛ jɛmɛ. No sɛɛ lɛ, Abraham fimɔ Isak niji kɛ enaji, ni ewó lɛ efɔ̃ afɔleshãa latɛ lɛ nɔ.

Abraham kɔ kakla lɛ. Nɔŋŋ ni Yehowa bɔfo ko tsɛ lɛ kɛjɛ ŋwɛi, ni ekɛɛ lɛ akɛ: ‘Abraham!  Kaafee obi lɛ efɔŋ ko! Kpaako mina akɛ oheɔ Nyɔŋmɔ nɔ oyeɔ, ejaakɛ oosumɔ ni okɛ obi lɛ ashã afɔle.’ Kɛkɛ ni Abraham na too gwantɛŋnuu ko ni ekolontoi ela tsei komɛi yɛ koo lɛ mli. Oya nɔŋŋ ni efɛne Isak, ni ekɛ too gwantɛŋ lɛ moŋ shã afɔle.

Kɛjɛ nakai gbi lɛ nɔ kɛyaa lɛ, Yehowa tsɛ Abraham enaanyo. Ani ole nɔ hewɔ? Ejaakɛ Abraham fee nɔ fɛɛ nɔ ni Yehowa kɛɛ lɛ akɛ efee lɛ, kɛ́ enuuu shishi po.

Yehowa tĩ shi ni ewo Abraham lɛ mli. Ekɛɛ lɛ akɛ: ‘Majɔɔ bo, ni mahã obii lɛ, loo oseshibii lɛ ayi afa.’ Yehowa wo Abraham shi hu akɛ, ebaatsɔ eweku lɛ nɔ ejɔɔ gbɔmɛi kpakpai fɛɛ.