Ekirajünüshi Isaac nutuma Abraham süpüla alinjachin Jeʼwaa nüpüla otta süpüla nunoujain sünain tü nümakat Jeʼwaa. Wanaa sümaa 25 nuuyase Isaac, aluwataanüshi Abraham nutuma Jeʼwaa sünain aaʼinraa wanee kasa. ¿Kasache nuluwataaka anain nia?

«Anakajaʼa jooluʼu pümaale chi püchon waneeshikai chamüin suluʼumüin tü mmakat Moria. Puʼuteechi aaʼin nia chamüin», müshi Jeʼwaa nümüin Abraham. Oonooshi Abraham sümaa nünüiki Jeʼwaa mayaainjeʼe nnojoluin nütüjaain saaʼu jamüin nuchuntaka tia.

Waneemüin kaʼi, nütamaaka Abraham wattaʼa maalü, nümaaka Isaac namaa piamashii nüchepchia Moriamüin. Apünüinpa kaʼi naya sünain oʼunaa, neʼraka tü uuchikat wattajee. «Chajeeinjachi paala taya ooʼulaka chi tachonkai süpüla waʼwaajüinjachin chi Maleiwakai. Yaashiʼiya jia wapüla», nümaka Abraham namüin na nüchepchiakana. Naapaka Abraham tü sikikat nümüin Isaac otta niaka alüʼüjain tü rüikat. «¿Jalasü tü mürüt waʼajüinjatkat nümüin Jeʼwaa?», nümaka Isaac. «Naapeerü wamüin Jeʼwaa, tachonchee», nümaka Abraham nümüin.

Nantapa saaʼumüin tü uuchikat, nüpaaʼuwajaakalaka Abraham ipa. Kapükalaka nutuma chi nüchonkai, kaülajüsü nuuʼui nutuma sümaa najapü otta niʼitaaka nia saaʼu tü ipakat.

Naapaaka Abraham tü rüikat süpüla nusotuinjachin chi nüchonkai. Nusoutaka wanee aapiee nümaʼanajeejachi Jeʼwaa: «Nnojo puʼutüin naaʼin chi püchonkai, tatüjaaichipa aaʼu kanoulain maʼin pia nünain Maleiwa». Niʼraka Abraham wanee anneerü toolo  koʼooshi süka nuʼuwa saʼaka sütüna wunuʼu. Nüjüta nüma achikichi joo chi nüchonkai, niakalaka nuʼutuin aaʼin chi anneetkai niiʼiraka Isaac.

Soʼujeʼereʼeya tia «taʼaleewain», müshi Jeʼwaa nümüin Abraham. ¿Pütüjaa aaʼu jamüin maka nünüiki? Süka naaʼinrüin süpüshuaʼa tü nümakat Jeʼwaa, mayaainjeʼe nnojoluin nütüjaain saaʼu jamüin nuchuntaka tia.

Nüpansaajaka süchikuaʼa nünüiki Jeʼwaa nümüin Abraham: «Watteerü saalii puuʼuliwoʼu tatuma. Iseerü achiki ayaawajünaa, süka wainmeerüin maʼin shia». Tü nüküjeekalü achiki Jeʼwaa shia aneerüin sukuwaʼipa wayuu süpüshuaʼa sünainjee nüpüshi Abraham.