Ablaham plọn visunnu etọn Isaki nado yiwanna Jehovah bo nọ dejido opagbe Jehovah tọn lẹpo go. Ṣigba, to whenue Isaki tindo nudi owhe 25, Jehovah biọ to Ablaham si nado wà nude he na vẹawuna ẹn taun. Etẹwẹ nulọ?

Jiwheyẹwhe dọna Ablaham dọmọ: ‘Jaale, ze visunnu towe dopo gee lọ bo yí i do sanvọ́ to osó de he to aigba Molia tọn ji.’ Ablaham ma yọ́n nuhewutu Jehovah do biọ to e si nado wàmọ. Etomọṣo, e setonuna Jehovah.

To wunkẹngbe afọnnu fuu, Ablaham plan Isaki po awe to devizọnwatọ etọn lẹ mẹ po bo dedo Molia. To azán atọ̀n godo, yé jẹ osó lọ lẹ mọ hlan olá ji. Ablaham dọna devizọnwatọ etọn lẹ nado nọtepọn yé, bọ ewọ po Isaki po na yì basi avọ́sinsan lọ. Ablaham ze nake na Isaki dọ ni hẹn, bọ ewọ lọsu hẹn ohí de. Isaki kanse otọ́ etọn dọmọ: ‘Kanlin he mí na yí do basi avọ́sinsan lọ lo?’ Ablaham gblọn dọmọ: ‘Visunnu ṣie, Jehovah na wleawu etọn.’

Whenue yé jẹ osó lọ ji, yé tùn agbà de. Enẹgodo, Ablaham blá alọ po afọ Isaki tọn lẹ po bo ze e do agbà lọ ji.

Ablaham ze ohí lọ. To ojlẹ enẹ mẹ, angẹli Jehovah tọn dawhá sọn olọn mẹ dọmọ: ‘Ablaham! A gbleawuna yọpọ sunnu lọ blo! Todin n’yọnẹn dọ a tindo yise to Jiwheyẹwhe mẹ, na a desọn ojlo mẹ nado yí visunnu towe do sanvọ́ wutu.’ Enẹgodo,  Ablaham mọ agbò de he azò etọn lẹ plá do nukan go. E yawu tún Isaki bo yí agbò lọ do sanvọ́ do otẹn etọn mẹ.

Sọn gbenẹgbe sọyi, Jehovah nọ ylọ Ablaham dọ họntọn etọn. Be a yọ́n nuhewutu wẹ ya? Ablaham nọ wà nudepope he Jehovah biọ to e si, etlẹ yin to whenue e ma yọ́n nuhewutu Jehovah jlo dọ ni wàmọ.

Jehovah vọ́ opagbe etọn do na Ablaham dọmọ: ‘Yẹn na dona we, podọ n’na hẹn ovi towe lẹ kavi kúnkan towe sudeji.’ Enẹ dohia dọ Jehovah na dona mẹdagbe lẹpo gbọn whẹndo Ablaham tọn gblamẹ.