Abraham wa honga omuatje we omuzandu Isak okusuvera Jehova nokukara nongamburiro momakwizikiro we. Posiya Isak tjari nozombura ngahino 25, Jehova wa ningira Abraham okutjita otjiṋa tji tjari otjizeu ku ye. Otjo tjari otjikwaye?

Mukuru wa raera Abraham kutja, ‘Arikana toora omuatje woye omuzandu u kemutjite otjombunguhiro ku ami kondundu mehi raMorija.’ Abraham kaa tjiwa kutja omena ratjike Jehova tje mu raera okutjita nao. Posiya wa kara nonḓuviro ku Jehova.

Omuhuka omunene mbwa kongorera ko Abraham wa toora Isak novakarere ve 2 nave i munda waMorija. Kombunda yomayuva 3 va uta okumuna ozondundu nḓa okuza kokure. Abraham wa raera ovakarere ve okuundjira mbo ngunda eye na Isak amave i okukatjita ombunguhiro. Abraham wa yandja ozonguṋe ku Isak, nu Abraham wa toora oruvyo. Isak wa pura ihe kutja, ‘Otjinamuinyo tji pi tji matu kapunguha?’ Abraham wa zira kutja, ‘Muatje wandje Jehova ongu me tupe.’

Nowo tji va vaza pondundu, va tunga otjipunguhiro. Abraham wa kuta ozombaze nomake waIsak ne mu twapo kombanda yotjipunguhiro.

Abraham wa toora oruvyo, nu tjimanga, omuengeli waJehova we mu isana okuza meyuru na tja: ‘Abraham! O hihamisa omuzandu woye! Ami nambano me tjiwa kutja u nongamburiro mu Mukuru mena rokutja ko ndji  ruruparere omuzandu woye otjombunguhiro.’ Okuzambo Abraham wa muna onḓu ndja kakatera motjihwa. Eye wa hakahana okukutura Isak na punguha onḓu moruveze rwe.

Okuza keyuva ndo, Jehova wa isana Abraham kutja epanga re. Mo tjiwa kutja omena ratjike? Abraham aa tjiti otjiṋa atjihe Jehova tje mu ningire, nandarire kutja kaa tjiwa kutja omena ratjike Jehova tji ma vanga kutja ma tjite nao.

Jehova wa raera Abraham rukwao: ‘Ami me ku sere ondaya, ne takavarisa ovanatje poo ozondekurona zoye.’ Pu mape hee kutja Jehova ma sere ondaya kovandu avehe ovawa okupitira meṱunḓu raAbraham.