Iburahimu nĩ aarutĩte mũrũ wake Isaaka kwenda Jehova na kwĩhoka ciĩranĩro ciake ciothe. No Isaaka arĩ na mĩaka 25 ũguo, Jehova nĩ eerire Iburahimu eke ũndũ warĩ mũritũ mũno. Ũndũ ũcio warĩ ũrĩkũ?

Ngai eerire Iburahimu ũũ: ‘Oya mũrũguo ũcio na ũthiĩ ũmũrute igongona kĩrĩma-inĩ kĩa Moria.’ Iburahimu ndaamenyaga Jehova amwĩrire eke ũguo nĩkĩ. Ĩndĩ no aathĩkĩire Jehova.

Mũthenya ũyũ ũngĩ rũcinĩ tene, Iburahimu nĩ oire Isaaka na ndungata ciake igĩrĩ na magĩthiĩ merekeire Moria. Thutha wa thikũ ithatũ nĩ monaga kĩrĩma kĩu wega. Iburahimu akĩra ndungata ciake cieterere hau, nake mathiĩ na Isaaka makarute igongona. Iburahimu akĩnengera Isaaka ngũ akuue, nake akĩoya kahiũ. Isaaka akĩũria ithe ũũ: ‘Ĩrĩ ha nyamũ ĩrĩa tũrathiĩ kũruta igongona?’ Iburahimu akĩmũcokeria: ‘Mũrũ wakwa, Jehova nĩ egũtũhe.’

Rĩrĩa maakinyire kĩrĩma-inĩ kĩu, nĩ maakire kĩgongona. Thutha ũcio, Iburahimu akĩoha Isaaka moko na magũrũ na akĩmũigĩrĩra kĩgongona-inĩ kĩu.

Iburahimu akĩoya kahiũ na igũrũ. Hĩndĩ o ĩyo, mũraika wa Jehova agĩtana kuuma igũrũ: ‘Iburahimu! Ndũkahutie mwana ũcio! Rĩu nĩ ndamenya atĩ ũrĩ  na wĩtĩkio harĩ Ngai tondũ nĩ ũkwĩhaarĩirie kũruta mwana waku igongona.’ Thutha ũcio, Iburahimu akĩona ndũrũme ĩhatĩte hĩa handũ kĩhinga-inĩ. Akĩohora Isaaka na ihenya na akĩruta ndũrũme ĩyo igongona.

Kuuma mũthenya ũcio, Jehova eetaga Iburahimu mũrata wake. Hihi nĩ ũĩ nĩkĩ? Nĩ tondũ Iburahimu eekaga ũrĩa wothe Jehova eendaga, o na rĩrĩa ataramenya gĩtũmi kĩa Jehova kũmwĩra eke ũguo.

Jehova nĩ aacokerire o rĩngĩ kĩĩranĩro gĩake harĩ Iburahimu: ‘Nĩ ngũkũrathima na ndũme njiarũa ciaku ciingĩhe.’ Ũguo nĩ kuuga atĩ Jehova nĩ angĩarathimire andũ othe ega kũgerera harĩ Iburahimu.