Abraham okwa li a honga omona waye Isak a kale e hole Jehova nokulineekela omaudaneko aYe aeshe. Ndele eshi Isak a li e na omido 25 lwaapo, Jehova okwa li a pula Abraham a ninge oshinima shimwe osho sha li shidjuu neenghono. Mbela okwa li e mu lombwela a ninge shike?

Kalunga okwa li a lombwela Abraham a ti: ‘Kufa omumwoye ewifa, ndele to ke mu yamba exwikiloyambo komhunda i li medu laMoria.’ Abraham ka li e shii kutya omolwashike Jehova e mu lombwela a ninge ngaho. Ashike okwa li a dulika kuJehova.

Mefiku la landula ko ongula inene, Abraham okwa li a kufa Isak novapiya vaye vavali ndele tava i va finda komhunda yaMoria. Konima yomafiku atatu, ova li ve wetele eemhunda kokule. Opo nee Abraham okwa li a lombwela ovapiya vaye ve va teelele omanga ye naIsak tava ka yamba exwikiloyambo. Abraham okwa li a lombwela Isak a humbate oikuni, ndele Abraham ta kufa omukonda. Isak okwa pula xe ta ti: “Odi yexwikiloyambo oi li peni?” Abraham okwa li e mu nyamukula a ti: “Kalunga ote ke limonena odi yexwikiloyambo, omumwange.”

Eshi Abraham va fika komhunda oyo, ova tunga oaltari. Opo nee okwa li a manga Isak komaoko nokomaulu ndele te mu nangeke koaltari.

Abraham okwa kufa omukonda, ndele diva omweengeli waJehova okwa ingida okudja meulu ta ti: ‘Abraham! Eke loye ino li kumifa omumwoye. Osheshi paife ondi shi shii kutya ou na eitavelo molwaashi ino anya okuyambela nge omumwoye.’ Konima yaasho, Abraham okwa li a mona odi ya dingila eembinga dayo moshixwa, nokwa  mangulula diva Isak ndele ta yambe po odi oyo exwikiloyambo ponhele yomona.

Okudja opo, Jehova okwa ti kutya Abraham okaume kaye. Mbela ou shii kutya omolwashike? Omolwaashi Abraham okwa li ha ningi keshe osho Jehova te mu lombwele a ninge, nokuli nonande omafimbo amwe ka li ha kala e udite ko kutya omolwashike e na oku shi ninga.

Jehova okwa li a endulula eudaneko olo a li a udanekela aAbraham a ti: ‘Ohandi ke ku nangeka noupuna, noludalo loye ohandi ke li hapupalifa unene.’ Osho osha hala kutya Jehova okwa li ta ka nangeka noupuna ovayuki aveshe okupitila moludalo laAbraham.